ქართული ოცნების თავმჯდომარის, ირაკლი კობახიძის განცხადებით, ექსპრეზიდენტი მიხეილ სააკაშვილი სამედიცინო დაწესებულებაში გადაყვანა, შეიძლება, შესაძლებელი გახდეს, თუ სპეციფიკური ოპერაციის საჭიროება იქნება. ამის შესახებ მან იმედის ეთერში ისაუბრა.

"[სააკაშვილის კლინიკაში გადაყვანა] შეიძლება, შესაძლებელი გახდეს, მხოლოდ იმ შემთხვევაში, თუ იქნება სპეციფიკური ოპერაციის საჭიროება. თუ არის, დავუშვათ, ასეთი რამ რომ არის რაღაც სპეციფიკური ოპერაციის საჭიროება, ამ შემთხვევაში, ის რისკებიც აღარ არსებობს, რომელიც თავდასხმასთან არის დაკავშირებული", — განაცხადა კობახიძემ.

მისივე თქმით, სამი კვირაა ითხოვენ სააკაშვილის კლინიკაში გადაყვანას, მაგრამ მას ეს საჭიროება არ აქვს, რადგან ის არის "კარგად, ჯანმრთელად და იკვებება".

ექსპრეზიდენტი უკვე 48 დღეა შიმშილობს. მიხეილ სააკაშვილი და მისი ადვოკატები სამოქალაქო კლინიკაში გადაყვანას ითხოვენ, თუმცა ხელისუფლება უარზეა — ამის ნაცვლად ის გლდანის ციხის სამკურნალო დაწესებულებაში იძულებით შეიყვანეს.

სტრასბურგის სასამართლომ, მხარეთა ინტერესების შესაბამისად და სასამართლო პროცედურების სწორად წარმართვისთვის, სააკაშვილს შიმშილობის შეწყვეტისკენ მოუწოდა. ამის შემდეგ სააკაშვილმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.