საქართველოს პარლამენტის წევრის, სალომე სამადაშვილის განცხადებით, პრეზიდენტის განცხადება, გარკვეულწილად, დისტანცირება იყო იმისგან, თუ როგორ ექცევა ხელისუფლება მიხეილ სააკაშვილს. თუმცა მისი თქმით, ეს საკმარისი არ არის.

"მომეჩვენა, რომ საქართველოს პრეზიდენტმა, გარკვეულწილად, დისტანცირება სცადა იმისგან, თუ როგორ ექცევა დღეს ქართული ოცნება ქვეყნის ყოფილ პრეზიდენტს [...] მიმაჩნია, რომ ეს არ არის საკმარისი და მაშინ, როდესაც პრეზიდენტის ხელში არის პრეროგატივა, გამოიყენოს შეწყალების ინსტიტუტი, რაც იქნებოდა ძალიან სერიოზული გარღვევა ჩვენს ქვეყანაში პოლიტიკური ვითარების სტაბილიზაციის და ძალიან მნიშვნელოვანი ნაბიჯი ეროვნული შერიგების მიმართულებით, ვფიქრობ, რომ მისი მხრიდან საზოგადოება უფრო გაბედულ ნაბიჯებს ელოდება", — განაცხადა მან.

ექსპრეზიდენტის შიმშილობის 48-ე დღეს მოქმედმა პრეზიდენტმა ბრიფინგი გამართა და განაცხადა, რომ სააკაშვილი ჩვეულებრივი პატიმარი არ არის და როგორც სხვა პატიმრები, ვერ ისარგებლებს სამოქალაქო კლინიკით, რადგან ეს შესაძლო საფრთხეებთან არის დაკავშირებული რისი დაზღვევაც მისი აზრით, ურთულესია.

მანვე აღნიშნა, რომ ქვეყნის სახე იმაში გამოიხატება, თუ როგორ მოეპყრობიან პატიმრობაში მყოფ ექსპრეზიდენტს და ხაზი გაუსვა, რომ სააკაშვილის ღირსება დაცული უნდა იყოს "მისივე ქცევის მიუხედავად".

მან კატეგორიულად მიუღებელი უწოდა ღირსებისა და პატივის შემლახავი კადრების გავრცელებას და მმართველი გუნდის რიტორიკა გააკრიტიკა. მისი თქმით, ზოგიერთი ოფიციალური პირის გაკეთებული გამომწვევი განცხადებები საზოგადოებაში მეტ გაუგებრობას, დაძაბულობასა და გაღიზიანებას იწვევს და ამ ვითარებაში კომენტარები მოზომილი უნდა იყოს.

ზურაბიშვილმა სამწუხაროდ შეაფასა ის, რომ ექსპრეზიდენტ მიხეილ სააკაშვილის ჯანმრთელობის მდგომარეობის გამო შექმნილ კონსილიუმს მუშაობის გაგრძელების შესაძლებლობა არ მიეცა.

გაიგეთ მეტი: