მიხეილ სააკაშვილის დედის, გიული ალასანიას განცხადებით, პრეზიდენტის, სალომე ზურაბიშვილის დღევანდელმა გამოსვლამ მას იმედი გაუჩინა. მისი თქმით, სამოქალაქო კლინიკაში გადაყვანაზე მკაფიო საუბარი არ ყოფილა, თუმცა "აქეთ მივდივართ".

"მე გამიჩინა რაღაც იმედი ქალბატონი სალომეს დღევანდელმა გამოსვლამ, აშკარად გამიჩინა, იმიტომ, რომ ლაპარაკი იყო იმაზე, რომ პროცესი უნდა იყოს საჯარო, გამჭვირვალე, ლაპარაკი იყო იმაზე, რომ ზოგიერთი ოფიციალური პირის არაფრთხილი გამოთქმა საზოგადოებაში ღელვას იწვევს და რომ შეიძლება, ეს, რაღაცნაირად, თავიდან ავიცილოთ და ლაპარაკი იყო იმაზე, რომ ფოკუსში უნდა იყოს ადამიანის ჯანმრთელობა, ასეთი შთაბეჭდილება დამრჩა", — აღნიშნა მან მთავარი არხის ჟურნალისტთან.

ალასანიას თქმით, ბრიფინგისთვის ბოლომდე არ უსმენია, თუმცა რაც მოისმინა, პიზიტიურად ეჩვენა.

ექსპრეზიდენტის შიმშილობის 48-ე დღეს მოქმედმა პრეზიდენტმა ბრიფინგი გამართა და განაცხადა, რომ სააკაშვილი ჩვეულებრივი პატიმარი არ არის და როგორც სხვა პატიმრები, ვერ ისარგებლებს სამოქალაქო კლინიკით, რადგან ეს შესაძლო საფრთხეებთან არის დაკავშირებული რისი დაზღვევაც მისი აზრით, ურთულესია.

მანვე აღნიშნა, რომ ქვეყნის სახე იმაში გამოიხატება, თუ როგორ მოეპყრობიან პატიმრობაში მყოფ ექსპრეზიდენტს და ხაზი გაუსვა, რომ სააკაშვილის ღირსება დაცული უნდა იყოს "მისივე ქცევის მიუხედავად".

მან კატეგორიულად მიუღებელი უწოდა ღირსებისა და პატივის შემლახავი კადრების გავრცელებას და მმართველი გუნდის რიტორიკა გააკრიტიკა. მისი თქმით, ზოგიერთი ოფიციალური პირის გაკეთებული გამომწვევი განცხადებები საზოგადოებაში მეტ გაუგებრობას, დაძაბულობასა და გაღიზიანებას იწვევს და ამ ვითარებაში კომენტარები მოზომილი უნდა იყოს.

ზურაბიშვილმა სამწუხაროდ შეაფასა ის, რომ ექსპრეზიდენტ მიხეილ სააკაშვილის ჯანმრთელობის მდგომარეობის გამო შექმნილ კონსილიუმს მუშაობის გაგრძელების შესაძლებლობა არ მიეცა.

გაიგეთ მეტი: