საქართველოს სახალხო დამცველი, ნინო ლომჯარია და მისი ინიციატივით შემქნილი ექიმთა 7-კაციანი ჯგუფი ექსპრეზიდენტ მიხეილ სააკაშვილის სანახავად ციხის საავადმყოფოში დაახლოებით ერთი საათის წინ მივიდნენ. ისინი უკვე შევიდნენ პენიტენციური სამსახურის მე-18 დაწესებულების ტერიტორიაზე, თუმცა ჯერჯერობით უცნობია, მისცემენ თუ არა მათ სააკაშვილის მონახულების უფლებას.

ნინო ლომჯარიას განცხადებით, იუსტიციის სამინისტოს არ აქვს უფლება ბიუროკრატიული ან სხვა რაიმე მიზეზით მათ არ მისცეს მიხეილ სააკაშვილთან შეხვედრის უფლება.

"სახალხო დამცველი არასოდეს არ იღებს წინასწარ თანხმობას სამინისტროსგან ან პენიტენციური სამსახურისგან, რომ შევიდეს ციხეში. ჩვენ ნებისმიერ დროს, დაუბრკოლებლად უნდა მოგვეცეს საშუალება შევიდეთ და ვნახოთ პატიმარი დღის და ღამის რა მონაკვეთიც არ უნდა იყოს და რა ტიპის ციხეც არ უნდა იყოს", — განაცხადა ლომჯარიამ დაწესებულებაში შესვლამდე.

იმ შემთხვევაში თუ სახალხო დამცველის მიერ შეკრებილ ექიმთა ჯგუფს სააკაშვილთან შეუშვებენ, ისინი გაესაუბრებიან ექსპრეზიდენს, ასევე, გაეცნობიან მის სამედიცინო ისტორიას და დაათვალიერებენ ადგილზე არსებულ სამედიცინო აღჭურვილობას და ინფრასტრუქტურას.

"ამ ვიზიტის მიზანი არის, რომ ჩვენმა სამედიცინო ექსპერტებმა შეაფასონ პატიმარ და პაციენტ მიხეილ სააკაშვილის ჯანმრთელობის მდგომარეობა. ასევე, გაეცნონ იქ არსებულ სამედიცინო ინფრასტრუქტურას იმისათვის, რომ წარმოგვიდგინონ მათი ექსპერტული მოსაზრებები — არსებობს თუ არა ის სამედიცინო აღჭურვილობა თუ პირობები ადგილზე, რაც ამ ტიპის პაციენტისათვის იქნებოდა მკურნალობის ადეკვატური და ეფექტური საშუალება. მათ შორის, არა მხოლოდ შიმშილობის გაგრძელების, არამედ შიმშილობის შეწყვეტის პირობებშიც შესაძლებელია თუ არა ადგილზე გაეწიოს პაციენტს ადეკვატური მკურნალობა ისე, რომ დაცული იყოს მისი სიცოცხლე და ჯანმრთელობა", — განაცხადა ლომჯარიამ.

კითხვას, რატომ გახდა საჭირო ექსპრეზიდენტის ჯანმრთელობის მონიტორინგისთვის კიდევ ერთი კონსილიუმის შემქნა, ნინო ლომჯარიამ ასე უპასუხა:

"როგორც მოგეხსენებათ, არაერთგზის გამოვუცხადე საჯარო ნდობა სახელმწიფოს მიერ შემქნილი კონსილიუმის შემადგენლობას. თუმცა, იმის გამო, რომ 7 დღეა გადმოყვანილია მიხეილ სააკაშვილი ციხის საავადმყოფოში და ამ 7 დღის განმავლობაში სახელმწიფომ ვერ უზრუნველყო კონსილიუმის შესვლა და იქ მუშაობა, მივიღეთ გადაწყვეტილება, რომ სახალხო დამცველმა საკუთარი მანდატის ფარგლებში შექმნას ექსპერტთა ჯგუფი იმისათვის, რომ სახალხო დამცველის აპარატისთვის მათ მოამზადონ ექსპერტული სამედიცინო დასკვნა".

მიხეილ სააკაშვილის სამედიცინო მომსახურების მონიტორინგის მიზნით სახალხო დამცველმა ექიმთა კონსილიუმი დღეს წარადგინა. ჯგუფის მიზანია შეაფასოს რამდენად შეესაბამება ექსპრეზიდენტის ჯანმრთელობის უფლების დაცვას N18 სამკურნალო დაწესებულება ამჟამად და იქნება თუ არა ამ დაწესებულებაში ადეკვატური სამედიცინო სერვისის მიწოდება შესაძლებელი პატიმრის მიერ ხანგრძლივი შიმშილობის შეწყვეტის შემდეგ, როგორც ამას ადამიანის უფლებათა ევროპული სასამართლო 10 ნოემბრის გადაწყვეტილებით ითხოვს.

სახალხო დამცველის მიერ შემქნილი ექიმთა კონსილიუმის წევრი არიან:

• გიორგი გრიგოლია — ანესთეზიოლოგ-რეანიმატოლოგი;
• გრიგოლი ხურციძე — შინაგანი სნეულებები/ჰოსპიტალური მედიცინა;
• გიორგი კაჭარავა — კარდიოლოგი;
• გიორგი პაპიაშვილი — კარდიოლოგი/არითმიოლოგი;
• აიდა გოზალოვა — ჰემატოლოგი, კლინიკური ონკოლოგი, ინტერნისტი, პალიატიური
• მედიცინის სპეციალისტი;
• მამუკა მაჩაიძე — ინფექციონისტი, თერაპევტი;
• თენგო წულაძე — ნევროლოგი;
• ნინო ზავრაშვილი — ენდოკრინოლოგი