ქართული ოცნების აღმასრულებელი მდივანი მამუკა მდინარაძე ირწმუნება, რომ ექსპრეზიდენტი მიხეილ სააკაშვილი ციხის მულტიფუნქციურ კლინიკაში მკურნალობს. მდინარაძე მულტიფუნქციურს უწოდებს გლდანის ციხის საავადმყოფოს, რომელსაც სახალხო დამცველი და სხვა უფლებადამცველი ორგანიზაციები მიხეილ სააკაშვილისთვის არასათანადო სამკურნალო დაწესებულად აფასებენ და რამდენიმე კვირაა დაჟინებით ითხოვენ შესაბამის მულტიფუნქციურ საავადმყოფოში გადაყვანას.

"ვერცერთმა ადამიანი ვერ გასცა კითხვაზე პასუხი, რა საჭიროება არსებობს დღეს სამედიცინო თვალსაზრისით, თუმცა მე აქ დეტალებში ვერ შევალ, არ ვარ ამის მცოდნე და სპეციალისტი, მაგრამ ელემენტარულ დონეზეც კი, რა სამედიცინო სერვისის გაწევის საჭიროება არსებობს დღეს, რის გამოც ის უნდა გადავიდეს მულტიფუნქციურ კლინიკაში. ამავე დროს დღეს გვესმოდა განცხადებები: "გადაიყვანეთ საავადმყოფოში". საავადმყოფოშია. ჩვენ გვემის მოწოდებები: "გადაიყვანონ მულტიფუნქციურ კლინიკაში". ის არის მულტიფუნქციურ კლინიკაში. გადაიყვანეთ საავადმყოფოში, ის არის საავადმყოფოში. ისე ხმოვანდება ოპოზიციის ფეიკ მესიჯები, თითქოს ის არ არის საავადმყოფოში, ამ დროს ის საავადმყოფოშია", — განაცხადა მდინარაძემ.

მიხეილ სააკაშვილი ამჟამად გლდანის ციხის საავადმყოფოს კლინიკაში იმყოფება. ის მე-18 პენიტენციურ დაწესებულებაში მისი და მისი ადვოკატების ნების საწინააღმდეგოდ 8 ნოემბერს გადაიყვანეს. სააკაშვილი 46-ე დღეა შიმშილობს.