ამერიკის შეერთებული შტატების ყოფილი ელჩი, უილიამ კორტნი ქართული ოცნების თავმჯდომარის, ირაკლი კობახიძის განცხადებას ეხმაურება და აცხადებს, რომ დასავლელი მეგობრები გაკვირვებულები არიან. მისივე თქმით, საქართველო დასავლეთს შორდება.

"საქართველოს დასავლელი მეგობრები გაკვირვებულები არიან, რატომ აშორებენ მისი ლიდერები ქვეყანას დასავლეთს. მოელიან თუ არა ეს ლიდერები, რომ საქართველოდან სადმე სხვაგან იპოვის ერთგულ მეგობრებს?" — წერს ის.

გუშინ, 13 ნოემბერს ქართული ოცნების თავმჯდომარემ ვრცელი ფეისბუქპოსტი გამოაქვეყნა, სადაც მმართველი გუნდის კრიტიკის პასუხად ევროპელი პარტნიორები გააკრიტიკა და მათ რადიკალური ოპოზიციის უცხოელი ლობისტები უწოდა. ევროპარლამენტარ ანა ფოტიგას მიერ "პოლიტპატიმრების" ხსენების გამო, მან განაცხადა, რომ პარტნიორებმა ან უნდა აღიარონ, რომ საქართველო სახელმწიფოა, სადაც კანონი კანონობს, ან "მოუწევთ", რომ მათ უწოდონ "კრიმინალების მფარველები". კობახიძის თქმით, ევროპარლამენტარებმა უნდა აჩვენონ, რომ არიან საქართველოს მეგობრები და არა სააკაშვილის.

ქართული ოცნების თავმჯდომარემ განაცხადა ისიც, რომ პარტნიორებთან სამომავლო ურთიერთობისას ამ პრინციპით იხელმძღვანელებენ და არ ითანამშრომლებენ მათთან, ვინც მიკერძოების გამო "საქართველოს სახელმწიფოდ არ ცნობს". სავარაუდოდ, ეს არაერთ ევროპარლამენტარს ეხება, რადგან კობახიძეს და პრემიერმინისტრ, ირაკლი ღარიბაშვილის ბევრი მათგანი ჰყავს გაკრიტიკებული ოპოზიციის მხარდამჭერი განცხადებების გამო.

ნაციონალური მოძრაობის თავმჯდომარემ, ნიკა მელიამ კობახიძის განცხადება საგარეო პოლიტიკური კურსის ცვლილებად შეაფასა. მისი განცხადებით, კობახიძემ ყველა პარტნიორს უთხრა, რომ თუ საქართველოს მართლმსაჯულებას პოლიტიზებულს უწოდებენ ან იტყვიან, რომ პოლიტპატიმრები ჰყავთ, მათ ქვეყნის მტრებად გამოაცხადებენ.