ევროპარლამენტარი რასა იუკნევიჩიენე აცხადებს, რომ საქართველოს ხელისუფლებისგან საზიზღარი ქმედებაა ევროპელი პოლიტიკოსებისთვის ექსპრეზიდენტის მოსანახულებლად შესვლაზე უარის თქმა. მისივე განცხადებით, ქართულ ოცნებას დეესკალაცია არ სურს.

"საქართველოს ხელისუფლებისგან საზიზღარი ქმედებაა უარის თქმა ევროპარლამენტარ ანა ფოტიგასა და ლიტვის პარლამენტის დელეგაციისთვის, ჰქონოდათ შესაძლებლობა ენახათ საქართველოს ყოფილი პრეზიდენტი მიხეილ სააკაშვილი ციხეში. ქართულ ოცნებას დეესკალაცია არ სურს", — წერს იუკნევიჩიენე.

ევროპარლამენტარი ანა ფოტიგა და ლიეტუველი პარლამენტარები საქართველოში 12 ნოემბერს ჩამოვიდნენ. ფოტიგა მოშიმშილე ელენე ხოშტარიას შეხვდა, თუმცა ორი დღის განმავლობაში ვერ შეძლო შესვლა საპატიმროში ექსპრეზიდენტ მიხეილ სააკაშვილის სანახავად.

იუსტიციის მინისტრი რატი ბრეგაძე აცხადებს, რომ ისინი ექსპრეზიდენტის სანახავად არ შეუშვეს, რადგან სააკაშვილთან დაიშვებიან მხოლოდ საქართველოს პატიმრობის კოდექსით გათვალისწინებული ვიზიტორები. მისი განმარტებით, ამის მიზეზი სააკაშვილის ჯანმრთელობისა და უსაფრთხოების უზრუნველყოფასთან დაკავშირებით პენიტენციური სამსახურის ვალდებულების გათვალისწინებაა.

მმართველ გუნდს არაერთხელ გაუკრიტიკებია ანა ფოტიგა იმ კრიტიკული ტონის გამო, რასაც ევროპარლამენტარი მათდამი იჩენს. პრემიერმინისტრმა კი საარჩევნო კამპანიის დროს განაცხადა, რომ არც ფოტიგა, არც კუბილიუსი მისთვის და ქვეყნისთვის არაფერს არ წარმოადგენენ.