უკრაინის საგარეო უწყების განცხადებით, მიხეილ სააკაშვილის საკითხის განსხილველად მინისტრის მოადგილე უკრაინაში საქართველოს ელჩს შეხვდა. უწყების ინფორმაციით, საგარეო საქმეთა მინისტრის მოადგილემ ხაზგასმით აღნიშნა, რომ საქართველო ღირსეულად უნდა მოექცეს მათ მოქალაქეს. გარდა ამისა, განაცხადა, რომ ისევ განსაკუთრებული ყურადღებით დააკვირდებიან სააკაშვილის უფლებების დაცვას, რომელთა უზრუნველყოფა საერთაშორისო სამართლის შესაბამისად საქართველო ვალდებულებაა.

"მინისტრის მოადგილემ ქართული მხარის ყურადღება გაამახვილა ჩვენი სახელმწიფოს პოზიციაზე, უკრაინის მოქალაქის, მიხეილ სააკაშვილის მიმართ ღირსეული მოპყრობის აუცილებლობისა და მის მიმართ ფიზიკური ძალის გამოყენების დაუშვებლობის შესახებ", — ვკითხულობთ სამინისტროს განცხადებაში.

როგორც უკრაინსკაია პრავდა წერს, საქართველოს ელჩი ამ კვირაში უკვე მეორედ დაიბარეს. პირველად მაშინ, როცა ექსპრეზიდენტი სააკაშვილი გლდანის ციხის სამკურნალო დაწესებულებაში მისი სურვილის წინააღმდეგ გადაიყვანეს. ამჯერად კი მიზეზი გავრცელებული კადრები გახდა.

დღეს, 11 ნოემბერს პენიტენციურმა სამსახურმა გაავრცელა კადრები, რომლებშიც ჩანს, რომ მიხეილ სააკაშვილი გლდანის ციხის სამკურნალო დაწესებულებაში ძალის გამოყენებით გადაჰყავთ. კადრების მიხედვით, სააკაშვილი სასწრაფო დახმარების მანქანიდან იძულებით გამოიყვანეს, ძალით შეიყვანეს შენობის დერეფნებსა და ლიფტშიც, კერძოდ, ფეხებსა და ხელებში ჩაავლეს ხელი, რა დროსაც ტანსაცმელი თითქმის გახდილი აქვს. ექსპრეზიდენტი ციხის საავადმყოფოს პალატაში უკვე წელზევით შიშველი შეიყავნეს და პირდაპირ იატაკზე დასვეს.

ამ ვიდეოს გამოქვეყნდებიდან რამდენიმე საათში პენიტენციურმა სამსახურმა მეორე ვიდეო გამოაქვეყნა, სადაც მიხეილ სააკაშვილი უკვე გაჩერებულ სასწარაფო დახმარების მანქანაშია და ამბობს, რომ არ გადმოვა. ის რუსთავის ციხეში დაბრუნებას ითხოვს. აღსანიშნია რომ მანამდე, პირველი ვიდეოს გავრელების შემდეგ უწყება ამტკიცებდა, რომ სააკაშვილმა რუსთავის დაწესებულება თავისი ნებით დატოვა.

პენიტენციური სამსახურის ვიდეოები დამონტაჟებულია. თითოეული მათგანის გამოქვეყნებას უწყება მაღალი საზოგადოებრივი ინტერესით ხსნის. უწყების განცხადებით, დღეს გავრცელებულ "კადრებში ნათლად ჩანს, როგორ არ ემორჩილება [სააკაშვილი] დაწესებულების თანამშრომლების კანონიერ მითითებებს, იქცევა აგრესიულად და მათ სიტყვიერ შეურაცხყოფას აყენებს".

ექსპრეზიდენტის იძულებით შეყვანის ვიდეოს გავრცელებამდე კი იუსტიციის მინისტრმა განაცხადა, რომ კადრებს იმის უარსაყოფად გამოაქვეყნებდნენ, რასაც სააკაშვილის ადვოკატი, ნიკა გვარამია ამტკიცებდა. მისი თქმით, გვარამიას განცხადება, დაწესებულებაში სააკაშვილის იძულებით შეყვანისა და იმის შესახებ, რომ სხვა პატიმრებს წინასწარ ჰქონდათ ინფორმაცია, სიცრუეა და ამ სიცრუეს "სულ რამდენიმე წამში" ამხელდნენ.