ნაციონალური მოძრაობის თავმჯდომარე ნიკა მელია აცხადებს, რომ პროცესი მათი გეგმით მიდის და "ივანიშვილის რეჟიმი" ხანგრძლივ პროტესტს ვერ გაუძლებს. მისი თქმით, მიხეილ სააკაშვილი მე-18 დაწესებულებაში იმიტომ გადაიყვანეს, რომ იქ ხალხი მისულიყო, პროვოკაცია მოეწყოთ და მასობრივი დაჭერებით ჩაეხშოთ პროტესტი.

"პროცესი ჩვენი გეგმით მიდის. ივანიშვილის რეჟიმმა იცის, რომ არ ეყოფა გამძლეობა ხანგრძლივ პროტესტს გაუძლოს. 8 ნოემბერს მათ ჩვენი მრავალათასიანი აქციის წინ სააკაშვილის გატაცება და გლდანში გადაყვანა იმიტომ დაგეგმეს, რომ გამწარებული ხალხის კოლონები ციხესთან მისულიყო, იქ პროვოკაციას მოგვიწყობდნენ და მასობრივი დაჭერებით ჩაახშობდენ მოძრაობას, ასევე მიშასაც პროვოკაციას მოუწყობდნენ ციხის შიგნით", — აცხადებს ის.

მელიას თქმით, ხელისუფლების მიზანია ოპოზიციის ფიზიკურ დაპირისპირებაში ჩათრევა, რადგან ეშინიათ, რომ მალე პოლიციაც აღარ დაემორჩილებათ. ენმ-ს თავმჯდომარე აცხადებს, რომ ოპოზიცია არაძალოდობრივად წაართმევს ქართულ ოცნებას ძალაუფლებას და დაუბრუნებს ხალხს.

მელიამ აღნიშნა ისიც, რომ სააკაშვილის ირგვლივ მიმდინარე მოვლენები, გარდა "ივანიშვილის პირადი საძაგელი და არაკაცული შურისძიებისა, არის ძღვენი პუტინისთვის".

"ჩვენი გეგმა ყოველდღიური პროტესტია, რომელიც ფიტავს და ასუსტებს რეჟიმს. ათასობით ადამიანი მზადაა ეს ყოველდღე აკეთოს, ათიათასობით მზადაა შემოგვიერთდეს დიდ საპროტესტო დემონსტრაციებზე, რომელსაც ასევე ვგევმავთ. თავის პროტესტს გეგმავს ძალიან ბევრი ჩვენგან დამოუკიდებელი ჯგუფი. ეს ერთი დიდი ტალღა იქნება, რომელიც მარტო საპოლიციო ძალის იმედად დარჩენილ რეჟიმს ჩამოანგრევს.

ადამიანებს ესმით, რომ ეს ბრძოლა, მიშას დახსნასთან ერთად სხვა ბრძოლაცაა — ვიქნებით ჩვენ ნორმალური დემოკრატიული დასავლური ქვეყანა თუ რუსეთის უკანა ეზო.
ყველას ესმის, რომ მიტაცებული არჩევნებით, დატყვევებული ქვეყნის მესამე პრეზიდენტი, მოსკოვის ომონის მეთოდებით მოქმედი პოლიციით, ანტიდასავლური იდეოლოგიით გაჯერებული რეჟიმი რუსეთის მსახურია", — წერს ის.

მელიას განცხადებით, "რეჟიმის გავრცელებული კადრები ბოლოს უღებს რეჟიმს". როგორც ის აღნიშნავს, ამ პროცესბს ივანიშვილი მართავს, როიმელიც მთავარი კრიმინალია.

"ეს კადრები არის მაგალითი მათი ველურობის, სიცბიერის, მატყუარობის, ფლიდობის და მეორე მხარეს საქართველოს მესამე პრეზიდენტის გაუტეხლობის პუტინის ჯალათების წინაშე. რამდენადაც ამაზრზენი არ უნდა იყოს ღარიბაშვილი ან კობახიძე, კალაძე, ბრეგაძე... ფოკუსი არ უნდა დაგვეკარგოს!

ეს ხალხი დაქოქილი ბოროტი თოჯინები არიან, მარიონეტები. ყველა უბედურების სათავე არის ერთი კაცი — ივანიშვილი (რომელიც უკვე კაცმა არ იცის სად არის). ისაა შემოქმედი ამ ტიპის ქვეყნის, რომელიც ვერ ვითარდება, ღარიბდება, სიძულვილის ტყვეობაშია. მოსმენები, ძალადობა, უტიფრობა, ინსტიტუტების ნგრევა — ყველაფერი ივანაშვილია. ახლა რაც ხდება ესეც 100% ივანიშვილია. ის ჩიტოც, კუპატაძეც, გოგა მემანიშვილიც, სერგო ბზიშვილიც, ვაჟა სირაძეც, ყველა მოძალადე პოლიციელიც ივანიშვილია. ისაა მთავარი კრიმინალი, 90-იანი წლების რუსეთში კრიმინალური "აბშიაკის" ბანკირი", — აცხადებს მელია.