საგარეო საქმეთა მინისტრმა, დავით ზალკალიანმა პროვოკაციად და ქართული დროშის შეურაცხყოფად შეაფასა რუსი პროპაგანდისტი ჟურნალისტების ქმედება სახელმწიფო არხის ეთერში. რუსეთის ფედერაციაში შვეიცარიის ელჩთან შეხვედრისას მან განაცხადა, რომ ეს რუსეთის დესტრუქციული პოლიტიკის ნათელი გამოხატულებაა, რომელიც საქართველოს სუვერენიტეტის, თავისუფლებისა და სახელმწიფოებრიობის წინააღმდეგაა მიმართული.

"დავით ზალკალიანმა შვეიცარელ მედიატორებთან მწვავედ გააპროტესტა რუსეთის სახელმწიფო ტელეარხის წარმომადგენელთა მხრიდან განხორციელებული პროვოკაციული ნაბიჯი, როგორც რუსეთის დესტრუქციული პოლიტიკის ნათელი გამოხატულება, რომელიც საქართველოს სუვერენიტეტის, თავისუფლებისა და სახელმწიფოებრიობის წინააღმდეგაა მიმართული. მსგავსი ნაბიჯებით რუსეთის ფედერაცია სრულად უგულებელყოფს საერთაშორისო სამართლის ფუნდამენტურ ნორმებსა და პრინციპებს და თავადვე ემიჯნება ღირებულებებსა და წესებზე დაფუძნებულ ცივილიზებულ სამყაროს", — ვკითხულობთ განცხადებაში.

რუსეთის პირველი არხის ეთერში კრემლის ცნობილმა პროპაგანდისტებმა, ოლგა სკაბეევამ და ევგენი პოპოვმა სტუდიაში იატაკზე საქართველოს დროშა გამოხატეს, რომელსაც ფეხს აბიჯებდნენ. ამავე ეთერში მათ საქართველოს პენიტენციური სამსახურის გავრცელებული ვიდეო სააკაშვილის დასამცირებლად გამოიყენეს და ბინძური და მოუწესრიგებელი უწოდეს.

ისინი დასცინოდნენ სააკაშვილის ვიზუალს და ამბობდნენ, რომ შიმშილობის გამო წონაში კლება მისთვის სასიკეთოა. ასევე, ირონიულად ეხმაურებოდნენ განცხადებას ციხის თანამშრომლების მხრიდან ძალადობასა და თმებით თრევის შესახებ და ამბობენ: "მიშიკოს ამოგლეჯილი თმები ციხეში ყრია". ეთერში გაჟღერდა არაერთი ანტიდასავლური, პროპუტინისტური მოსაზრება.