ნაციონალური მოძრაობის თავმჯდომარე, ნიკა მელია მიესალმება ყოფილი პრეზიდენტის, მიხეილ სააკაშვილის გადაწყვეტილებას, რომელმაც თქვა, რომ შიმშილობას შეწყვეტს, როგორც კი სათანადო დაწესებულებაში გადაიყვანენ.

"მე მივესალმები, ჩვენ მისი მეგობრები მივესალმებით მის გადაწყვეტილებას, რომელიც სულ რამდენიმე წუთის წინ ნიკა გვარამიამ გაასაჯაროვა და წაიკითხა მისი წერილი. კიდევ ერთხელ დადასტურდა, რომ ქართული ოპოზიციის და მიხეილ სააკაშვილის გეგმა არის ამ ქვეყნის განვითარება და არა ხელისუფლების რეჟიმის ანკესზე წამოგება და პროვოკაციაში ჩათრევა", — თქვა ნიკა მელიამ.

ექსპრეზიდენტი აცხადებს, რომ შიმშილობას შეწყვეტს, თუ ექიმთა კონსილიუმი მიიღებს გადაწყვეტილებას, რომელ მულტიფუნქციურ კლინიკაში და მკურნალობის რა პირობებში გადაიყვანენ მას შიმშილობის შემდეგ რეაბილიტაციისთვის.

მიხეილ სააკაშვილის ადვოკატებმა ევროპის ადამიანის უფლებათა სასამართლოს მიმართეს მოთხოვნით, საქართველოს მთავრობას ექსპრეზიდენტის მრავალპროფილურ სამოქალაქო კლინიკაში გადაყვანა დაავალოს.

სტრასბურგის სასამართლომ, მხარეთა ინტერესების შესაბამისად და სასამართლო პროცედურების სწორად წარმართვისთვის, სააკაშვილს შიმშილობის შეწყვეტისკენ მოუწოდა. ასევე, გადაწყვიტა, რომ მთავრობამ უნდა აცნობოს სააკაშვილის ჯანმრთელობის ამჟამინდელი მდგომარეობის, ისევე როგორც ციხის საავადმყოფოში გაწეული მკურნალობის შესახებ. გარდა ამისა, სასამართლოს გადაწყვეტილებით, მთავრობამ უნდა უზრუნველყოს სააკაშვილის უსაფრთხოება ციხეში და ზოგადად, ასევე, გაუწიოს შესაბამისი სამედიცინო დახმარება შიმშილობის შემდეგ გამოჯანმრთელების დროს.

სტრასბურგის გადაწყვეტილებას გაურკვევლობა მოყვა, რაც გუშინ, 10 ნოემბერს იუსტიციის მინისტრის განცხადებამ გამოიწვია. კერძოდ, ბრეგაძემ ფეისბუქგვერდზე დაპოსტა, რომ სტრასბურგმა არ დააკმაყოფილა სააკაშვილის საჩივარი კერძო კლინიკაში გადაყვანასთან დაკავშირებით. გუშინვე სააკაშვილის ადვოკატმა, ნიკა გვარამიამ განმარტა, რომ მათი სარჩელი არ ეხებოდა მხოლოდ კერძო კლინიკაში გადაყვანას და სასამართლომ დააკმაყოფილა მათი მოთხოვნა დროებითი ღონისძიების შესახებ. მისივე თქმით, სასამართლომ არ დაასახელა კლინიკა, მაგრამ დაასახელა სტანდარტი, რომელიც უნდა იყოს უზრუნველყოფილი და ეს მხოლოდ კერძო კლინიკაშია შესაძლებელი.

გაიგეთ მეტი: