მიხეილ სააკაშვილის ადვოკატი, ნიკა გვარამია აცხადებს, რომ 29 ნოემბერს სააკაშვილის საქმეზე მორიგი სასამართლო პროცესის ჩანიშვნით მოსამართლეებმა ექსპრეზიდენტს სასიკვდილო განაჩენი გამოუტანეს და თქვეს, რომ ამ დროისთვის ის ცოცხალი აღარ იქნება.

"29 ნოემბერს პროცესის ჩანიშვნა არის ცინიზმის მწვერვალი. მათ დღეს პრაქტიკულად სასიკვდილო განაჩენი გამოგვიტანეს შუამდგომლობაზე პროცესის ჩანიშვნით. პროცესის ჩანიშვნით 29-ში მიხეილ სააკაშვილზე თქვეს მათ, რომ ამ დროისთვის ის მაინც არ იქნება და 29-ში განვიხილავთ ამ საკითხს მის გარეშე, იმიტომ, რომ ცოცხალი არ იქნებაო. ეს არის დღევანდელი სასამართლოს გადაწყვეტილება, რომელსაც ვეუბნები: მიხეილ სააკაშვილი იქნება ცოცხალი და თქვენ არ იქნებით მოსამართლეები, მაღლა მზე იქნება და ეს ასე იქნება. მიხეილ სააკაშვილი 29-შიც ცოცხალი იქნება, იმის მერეც", — აცხადებს გვარამია.

სააკაშვილის კიდევ ერთმა ადვოკატმა, ბექა ბასილაიამ აღნიშნა, რომ ისინი მომდევნო სხდომის ჩანიშვნას მომავალი 10 დღის ფარგლებში ფიქრობდნენ, თუმცა ეს თარიღი კიდევ უფრო გადაწიეს, რაც იმას ნიშნავს, რომ ისინი ექსპრეზიდენტის ჯანმრთელობის მდგომარეობის კრიტიკულად დამძიმებას ელოდებიან.

"ვინიცობაა და სააკაშვილს ძლიერი ორგანიზმი აღმოაჩნდეს, იქნებ მომდევნო კვირაშიც ჰქონდეთ შესაძლებლობა, რომ გამოცხადდესო და ჩანიშნეს 29-ში, როცა მისი მდგომარეობა იქნება ან უაღრესად მძიმე, უკვე კრიტიკული, ან არადა ქართველი ხალხი გაიმარჯვებს პროტესტით", — თქვა მან სასამართლო დარბაზის დატოვების შემდეგ.

მიხეილ სააკაშვილი, მისი სურვილის მიუხედავად, სასამართლო პროცესზე დასასწრებად არ მიიყვანეს. პენიტენციური სამსახურის მტკიცებით, ამის მიზეზი სასამართლოში ესკორტირებისას შესაძლო "დესტრუქციული ხასიათის ქმედებაა". პროკურატურამ შუამდგომლობა დააყენა, რომ პენიტენციური დაწესებულების გადაწყვეტილების გამო, სხდომა ციხეში ჩატარდეს ან სააკაშვილი დისტანციურად ჩართონ.

სასამართლო პროცესზე სააკაშვილის დასწრებას ითხოვდნენ ადვოკატები და საქმეზე კიდევ ერთი ბრალდებული, გიგი უგულავა, რომელიც სასამართლო დარბაზიდან გააძევეს. ბექა ბასილაიამ მოსამართლეების აცილებაც მოითხოვა. მისი თქმით, მართლმსაჯულების აღსრულებისთვის სააკაშვილის სხდომაზე ყოფნა საჭირო იყო, თუმცა მოსამართლეებმა ეს არ გააკეთეს და "წინასწარ დაგეგმილ სცენარს" მიჰყვებოდნენ. მას შემდეგ რაც ადვოკატებმა პროცესზე სააკაშვილის დასწრება მოითხოვეს, ბასილაიამ მოსამართლეს უთხრა, რომ ის დანაშაულს სჩადის და მათი მოტივაცია გამოსაძიებელია. საპასუხოდ, მოსამართლემ განაცხადა, რომ შეურაცხყოფისთვის ეთიკის კომისიას მიმართავს.

ადვოკატის კიდევ ერთი მოთხოვნა სხდომაზე სააკაშვილის სხვა ადვოკატების, ნიკა გვარამიასა და დიმიტრი საძაგლიშვილის დაშვება იყო, პასუხად კი მიიღო, რომ უკვე მიმდინარე პროცესზე ეს ვერ მოხერხდებოდა. ამის შემდეგ ბასილაიამ განაცხადა, რომ პროცესის გაგრძელების აზრს ვერ ხედავს და დარბაზი დატოვა.

მიხეილ სააკაშვილს გამოძიება ედავება ძალადობით ან იარაღის გამოყენებით, დაზარალებულის პირადი ღირსების შეურაცხყოფით სამსახურებრივი უფლებამოსილების გადამეტებას, რამაც ფიზიკური ან იურიდიული პირის უფლების, საზოგადოების ან სახელმწიფოს კანონიერი ინტერესის არსებითი დარღვევა გამოიწვია. კერძოდ, ბრალდება ეხება 7 ნოემბრის აქციის დარბევას, ტელეკომპანია იმედში შეჭრასა და ბადრი პატარკაციშვილის ქონების დანაშაულებრივად ხელში ჩაგდებას.