20:00 საათზე თავისუფლების მოედანზე აქციის დაწყებამდე პარლამენტის შენობის ეზოში საპოლიციო ძალების მობილიზაციაა. ქართული ოცნების დეპუტატები აცხადებენ, რომ არანაირი დიდი მობილიზაცია არ მიმდინარეობს და ტექნიკის გადაადგილება საზოგადოებრივი წესრიგის უზრუნველსაყოფად არის საჭირო. მათივე თქმით, უკანონობასა და დესტრუქციას აღკვეთავენ.

ფოტო: ელენე ზაქაშვილი/On.ge

"არანაირ უპრეცედენტოზე არ არის საუბარი. გაკეთდა განცხადება შინაგან საქმეთა სამინისტროს მხრიდან დღეს ძალების მობილიზებასთან დაკავშირებით... ნუ შექმნით ქაოტურ ვითარებას. უკანონობა და დესტრუქცია იქნება აღკვეთილი", — განაცხადა მმართველი პარტიის დეპუტატმა, მიხეილ სარჯველაძემ ფორმულასთან.

რამდენიმე საათში თავისუფლების მოედანზე აქცია დაიწყება. აქცია 6 ნოემბერს რუსთავში მიმდინარე აქციაზე ნაციონალური მოძრაობის ლიდერმა, ნიკა მელიამ დააანონსა. მან სააკაშვილის კლინიკაში გადასაყვანად ხელისუფლებას 24-საათიანი ვადა მისცა, თუმცა მელიას მიერ მთავრობისთვის მიცემული ულტიმატუმის დრო გუშინ ამოიწურა.