ექსპრეზიდენტის ექიმის, ნიკოლოს ყიფშიძე კონსილიუმის წევრებთან სასწრაფოდ შეხვედრას ითხოვს. მისი თქმით, პენიტენციური სამსახურის მიერ კადრების გავრცელების შემდეგ, მიხეილ სააკაშვილმა ისევ უარი თქვა მკურნალობაზე და შესაძლოა, რამდენიმე საათში მისი მდგომარეობა კრიტიკული გახდეს.

"მე ვთხოვ პირველი კონსილიუმის წევრებს შევხვდეთ სასწრაფოდ, რაც შეიძლება სწრაფად და გადავწყვიტოთ რა ვქნათ. მისი მდგომარეობა გახდება კრიტიკულზე კრიტიკული, შეიძლება რამდენიმე საათში, შეიძლება მეტ საათში, დღე არ იქნება", — განაცხადა მან.

ყიფშიძე ამბობს, რომ ის კომისიის უბრალო წევრია და არაფერს წყვეტს, ამიტომ საჭიროა კონსულიუმის დაუყოვნებლივ მოწვევა, წინააღმდეგ შემთხვევაში, მოსალოდნელია ფატალური შედეგი.

სააკაშვილი უკვე 38-ე დღეა შიმშილობს. 6 ნოემბერს, ექსპრეზიდენტის მხარდამჭერი აქციის დაწყებამდე, პენიტენციურმა სამსახურმა გაავრცელა კადრები, სადაც, მათი მტკიცებით, მიხეილ სააკაშვილი "საკვებს იღებს". უწყებამ ვიდეოს გამოქვეყნება "მაღალი საზოგადოებრივი ინტერესით" ახსნა. ექიმები და ომბუდსმენი განმარტავენ, რომ ეს არის საკვები დანამატი და არა საჭმელი, რაც საერთაშორისო პროტოკოლით არის განსაზღვრული და შიმშილობის დარღვევად არ მიიჩნევა.

ინფორმაცია იმაზე, რომ სააკაშვილი საკვებ დანამატებს იღებს, ვიდეოს გავრცელებამდე ერთი დღით ადრე, 5 ნოემბერს იუსტიციის მინისტრმა, რატი ბრეგაძე გაავრცელა. 6 ნოემბერს სახალხო დამცველმა განაცხადა, რომ სააკაშვილის პატიმრობის პირობებისა და ჯანმრთელობის შესახებ განსაკუთრებული კატეგორიის პერსონალური მონაცემების გაცემისა და საჯაროდ გამოქვეყნების საკითხს შეისწავლიდა. მანვე აღნიშნა, რომ ექსპრეზიდენტი 30 ოქტომბრიდან წვენებსა და მინერალური შემცველობის პიურეებს სამედიცინო დანიშნულებით, მცირე ოდენობით იღებდა.