სახალხო დამცველის მოადგილე გიორგი ბურჯანაძე განმარტავს, რომ განცხადებები მოშიმშილე პატიმარზე დელიკატური უნდა იყოს, რომ მან შიმშილობის უფრო მკაცრ ფორმებს არ მიმართოს. ასე ეხმაურება ის ქართული ოცნების წევრების ირონიულ განცხადებებს ექსპრეზიდენტ მიხეილ სააკაშვილის შიმშილობაზე.

"მე, როგორც სახალხო დამცველის აპარატის წარმომადგენელს, ძალიან გამიჭირდება, პოლიტიკური განცხადებების შეფასებაში ბოლომდე შევიდე, მაგრამ, როცა საკითხი ადამიანის უფლებებს ეხება, ნებისმიერი პოლიტიკური განცხადება, თუ ა.შ. არ უნდა იყოს ადამიანის უფლებების შელახვის საწინდარი. ეს ძალიან მარტივი ჭეშმარიტებაა და, ბუნებრივია, სხვადასხვა განცხადება, რომელიც ჩვენ მოვისმინეთ შიმშილობასთან დაკავშირებით და ა.შ. არაერთხელ იქნა ჩვენს მიერ კრიტიკულად შეფასებული. როდესაც პატიმარი შიმშილობს, მასთან დაკავშირებით განცხადებები უნდა იყოს დელიკატური, რათა, არ მოხდეს, პირიქით, მისი წახალისება, რომ შიმშილობის უფრო მკაცრ ფორმებს მიმართოს", — განაცხადა მან ფორმულას ეთერში.

ქართული ოცნების დეპუტატებმა მიხეილ სააკაშვილის მიერ შიმშილობის დაწყების პირველი დღიდან ცინიკური და ირონიული განცხადებები არაერთხელ გააკეთეს.

სააკაშვილი პირველ ოქტომბერს დააკავეს. ის ბრალს არ აღიარებს და უკვე 35-ე დღეს შიმშილობს. მისი პირადი ექიმი აცხადებს, რომ ექსპრეზიდენტს ექიმების მეთვალყურეობა სჭირდება და საჭიროა სამოქალაქო კლინიკაში გადაყვანა. პენიტენციური სამსახური სააკაშვილს მხოლოდ ციხის კლინიკაში გადაყვანას სთავაზობს, რაზეც ყოფილი პრეზიდენტი უარს აცხადებს.