დროას დამფუძნებელი, ელენე ხოშტარია ქართული ოცნების დეპუტატებზე ამბობს, რომ თუ მიხეილ სააკაშვილის სამოქალაქო კლინიკაში გადაყვანის გადაწყვეტილება მიიღებენ, თუ უნდათ ყოველდღე ლანძღონ. მისივე თქმით, მოსალოდნელი იყო, რომ მმართველი პარტიის დეპუტატები მის შიმშილობაზე შეურაცხმყოფელ, ცინიკურ და ზიზღის კამპანიას დაიწყებდნენ.

"პირველ რიგში, ოცნება უნდა იყოს დაინტერესებული, თუ ისინი ამბობენ, რომ არც არაფერი სჭირს, ისინი უნდა იყვნენ დაინტერესებული, რომ გადაიყვანონ კლინიკაში და ეს კითხვები მოიხსნას. ამიტომ, კარგად იცის ოცნებამ, რაც არის მოთხოვნა, რაც არ უნდა თქვან ცალკეულმა დეპუტატებმა და რავიცი, თუ უნდათ ყოველდღე მლანძღონ, ოღონდ ეს გადაწყვეტილება მიიღონ", — აცხადებს ხოშტარია TV პირველთან.

ხოშტარია, ასევე, აღნიშნავს, რომ მისი შიმშილობით პოლიტიკური კრიზისი არ განიმუხტება, თუმცა მოთხოვნამ რომ "არ გარდაიცვალოს პრეზიდენტი" კონკრეტული, ლეგიტიმური, სამართლიანი და საღი აზრის ფარგლებშია.

"მოთხოვნა არის უმარტივესი, მოთხოვნა არის კანონის აღსრულება და კლინიკაში გადაყვანა. ამიტომაც, მე ძალიან ფრთხილად ვუყურებ შიმშილობის დაწყებას, არ შეიძლება სროლა ეგეთი რაღაცების დაუფიქრებლად, ძალიან სერიოზულ დისკომფორტს უქმნი ამით საზოგადოებას. ამიტომ, ძალიან კარგად ვიფიქრე, ზუსტად რა უნდა ყოფილიყო მოთხოვნა.

რა თქმა უნდა, კლინიკაში გადაყვანის შემთხვევაში პოლიტიკური კრიზისი არ განიმუხტება, მაგრამ მე შიმშილობას შევწყვეტ, იმიტომ, რომ მე ვიბრძვი კონკრეტული ლეგიტიმური, სამართლიანი, საღი აზრის ფარგლებში აუცილებელი მოთხოვნისთვის, რომ არ გარდაიცვალოს პრეზიდენტი, მე არ ვიცი მეტი ამაზე მარტივი რა უნდა ვთქვა", — ამბობს ის.

ელენე ხოშტარიამ შიმშილობა პარლამენტში 3 ნოემბერს დაიწყო. მისი თქმით, შიმშილობას არ შეწყვეტს მანამ, სანამ მესამე პრეზიდენტს, მიხეილ სააკაშვილს სამოქალაქო კლინიკაში არ გადაიყვანენ.

ქართული ოცნების დეპუტატმა, გურამ მაჭარაშვილმა ხოშტარიას შიმშილობაზე საუბრისას თქვა, რომ " ახლა, შეიძლება, სხვა რომელიმე ოპოზიციონერი გამოვიდეს და დაიწყოს შიმშილობა, რომ დაკმაყოფილდეს ხოშტარიას მოთხოვნა, რომ დაკმაყოფილდეს მერე პატიმარ სააკაშვილის მოთხოვნა".

ამას გამოეხმაურა მმართველი პარტიის კიდევ ერთი დეპუტატი, ნინო წილოსანი და განაცხადა, რომ თუ ხოშტარია ამით საზოგადოებასა და სახელმწიფოს აშანტაჟებს, ამას "ნამდვილად ვერ მოუწონებს".

სააკაშვილი პირველ ოქტომბერს დააკავეს. ის ბრალს არ აღიარებს, ამიტომ საპატიმროში გადაყვანის შემდეგ შიმშილობა დაიწყო და უკვე 35-ე დღეა შიმშილობს. მისი პირადი ექიმი აცხადებს, რომ ექსპრეზიდენტს ექიმების მეთვალყურეობა სჭირდება და საჭიროა კლინიკაში გადაყვანა. პენიტენციური სამსახური სააკაშვილს მხოლოდ ციხის კლინიკაში გადაყვანას სთავაზობს, ის უარზეა.