რესპუბლიკური პარტიის თავმჯდომარის, ხათუნა სამნიძის განცხადებით, ქვეყნისთვის სახიფათოა, რომ სახელმწიფო უსაფრთხოების სამსახური პარტიულ სტრუქტურას დაემსგავსა. მისი თქმით, სუს-ის განცხადებები ტერმინებითა და პათოსით ქართული ოცნების წევრის, შალვა პაპუაშვილის ბრიფინგის ტექსტებს დაემსგავსა.

"სახიფათოა ქვეყნისთვის, რომ ქვეყნის უსაფრთხოების სამსახური დაემსგავსა პარტიულ სტრუქტურას. აკეთებს ისეთ განცხადებებს, რომელიც ტერმინებით, პათოსით მახსენებს ბატონი შალვა პაპუაშვილის ბრიფინგების ტექსტს. მუქარაა ჩვეულებრივი, რომელიც არ ეფუძნება კონკრეტულ ფაქტებს და არც ვხედავთ რაიმე მსგავს და კიდევ ერთხელ, აქვე მინდა შევახსენო, მაგალითად, შარშან ზაფხულში საქმე, რომელიც აღძრეს და რის საფუძველზეც მე ვიყავი სუს-ის დაკითხვაზე იმის გამო, რომ კონკრეტული კომენტარი დავწერე ფეისბუქზე", — აცხადებს სამნიძე ფორმულასთან.

დღეს, 3 ოქტომბერს სახელმწიფო უსაფრთხოების სამსახურმა განცხადება გაავრცელა, რომლითაც სოციალურ ქსელებში "რევოლუციურ მოწოდებებს" გამოეხმაურა და მოქალაქეები სასჯელზე გააფრთხილა.

სუს-ის მტკიცებით, ბოლო დროს სოციალურ ქსელებსა და მასობრივი ინფორმაციის საშუალებებში მოქალაქეები განზრახ თუ გაუცნობიერებლად პირდაპირ მოუწოდებენ თანამოაზრეებს "რევოლუციისა და ხელისუფლების დამხობისკენ, მათ შორის ძალადობრივი გზებით". ამის ფონზე უწყება აცხადებს, რომ სახელმწიფო ხელისუფლების დამხობისკენ, მსგავსი მოწოდების შემცველი მასალის გავრცელება, ამავე მიზნით შეიარაღებული მოწოდება სისხლის სამართლის დანაშაულია და ისჯება თავისუფლების აღკვეთით 3 წლამდე.

მას შემდეგ რაც სუს-მა სოციალურ ქსელში რევოლუციური განწყობების შესახებ განცხადება გაავრცელა, მოქალაქეები "რევოლუციას" პოსტავენ.