ნაციონალური მოძრაობის ერთ-ერთი ლიდერის, ხატია დეკანოიძის განცხადებით, იმისთვის, რომ ვადამდელი საპარლამენტო არჩევნები დაინიშნოს და ექსპრეზიდენტის, მიხეილ სააკაშვილის მონახულება იყო შესაძლებელი, სადეპუტატო მანდატების შენარჩუნება აუცილებელია.

"ჩვენ გვჭირდება ეს მანდატი არა იმისთვის, რომ ყოველდღიურად პარლამენტში ვიაროთ, მაგალითად, და რაღაცა პროცედურულ საკითხებში მივიღოთ მონაწილეობა, არამედ იმისთვის, რომ ვადამდელი არჩევნები დაინიშნოს და ვადამდელ არჩევნებზე დავაჭიროთ თითი იმ ღილაკს, რომელიც არის აუცილებელი. აუცილებელია მისი ნახვა და ეს თანამებრძოლების ნახვა ყოველდღიურად, რაც არის უმნიშვნელოვანესი საკითხი, რაშიც რა თქმა უნდა, მეთანხმება. რა უნდა ბიძინა ივანიშვილს — რომ იგი მოაქციოს იზოლაციაში და არ ჰქონდეს არავითარი საშუალება ჩვენთან კომუნიკაციის", — ამბობს დეკანოიძე სააკაშვილთან შეხვედრის შემდეგ.

ამის შემდეგ, პარლამენტის დატოვების მოწოდებიდან მეორე დღეს, ექსპრეზიდენტმა განაცხადა, რომ დარწმუნებულია, ისეთი ტალღა აიწევა, რომელიც ივანიშვილს აიძულებს რიგგარეშე არჩევნები დანიშნოს, საკონსტიტუციო კენჭისყრისთვის მანდატით აღჭურვილი ოპოზიციონერების პარლამენტში ყოფნაა საჭირო. ის ასევე ამბობს, რომ დეპუტატების მხრიდან მანდატების დატოვების გადაწყვეტილება პატრიოტული მიდგომაა, თუმცა, მასთან ციხეში შესასვლელად და მუდმივი კონტაქტისთვის მანდატია საჭირო.

პირველ ნოემბერს ექსპრეზიდენტმა, მიხეილ სააკაშვილმა ოპოზიციას პარლამენტის დატოვებისკენ მოუწოდა. მისი თქმით, პარლამენტმა უკვე დაკარგა სახელისუფლებო პლატფორმის ფუნქცია და იქ ვერანაირ გადაწყვეტილებას ვეღარ მიიღებენ.

31 ოქტომბერს, პარლამენტთან ოპოზიციის მიერ გამართულ აქციაზე მამუკა ხაზარაძემ საპარლამენტო მანდატის დატოვების შესახებ განცხადება გააკეთა. სააკაშვილის მოწოდების შემდეგ იგივე გადაწყვეტილება ნაციონალური მოძრაობის დეპუტატებმა, ნონა მამულაშვილმა, ანა წითლიძემ და ლევან ვარშალომიძემაც მიიღეს. სადეპუტატო მანდატზე უარს ამბობს გირჩი — მეტი თავისუფლების ლიდერი, ზურაბ ჯაფარიძეც, თუმცა მან თქვა, რომ მანდატზე უარი განაცხადა შარლ მიშელის დოკუმენტის ანულირებისთანავე.