პარლამენტის დეპუტატის, ტარიელ ნაკაიძის განცხადებით, ლელოს ლიდერის, მამუკა ხაზარაძისა და ნაციონალური მოძრაობის წევრების მიერ საპარლამენტო მანდატის დატოვება საერთო ოპოზიციურ ბრძოლას დააზიანებს. მისივე თქმით, მსგავსი გადაწყვეტილებები ოპოზიციამ ერთობლივად უნდა მიიღოს.

"მამუკა ხაზარაძის მიერ დემონსტრაციაზე მანდატის დატოვების შესახებ განცხადება და თუნდაც შემდეგ ნაციონალური მოძრაობის ზოგიერთი წევრის პარლამენტის წევრობის დატოვებასთან დაკავშირებით განცხადება პირველ რიგში, არის მათი პირადი გადაწყვეტილება, მაგრამ ამგვარი გადაწყვეტილების ამ ფორმით მიღება საერთო ოპოზიციურ ბრძოლას არათუ არ წაადგება, არამედ, დააზიანებს კიდეც. თუ ვიღებთ გადაწყვეტილებას, რომ გადავიდეთ ბოიკოტის რეჟიმში, ან რაიმე შედეგს გვაძლევს პარლამენტის დატოვება, ამას წინ უნდა უძღოდეს საერთო ოპოზიციური განხილვები, რისკების შეფასება და ყველა შესაძლო სცენარის გააზრება. ამ ბრძოლაში არ აქვს მნიშვნელობა, ვინ წარმოადგენს დიდ პოლიტიკურ ძალას და ვინ — პატარას. თუ ვსაუბრობთ შედეგებზე დაფუძნებულ თანამშრომლობაზე, მაშინ ყველას აზრი თანაბრად უნდა იმსახურებდეს ყურადღებას", — წერს ის Facebook-ზე.

ამასთან, ნაკაიძე აღნიშნავს, რომ საკანონდმებლო ორგანოში ოპოზიციონერი დეპუტატების არარსებობა ქართული ოცნებისთვის იქნება საფუძველი, რომ საკონსტიტუციო ცვლილებები არ განხორციელდეს.

"დაგეგმილია საკონსტიტუციო ცვლილებები, რომლის მიხედვითაც, შემდგომი საპარლამენტო არჩევნები უნდა ჩატარდეს არა 5%-იანი, არამედ, დაბალი ბარიერით. ამის პირობა ქართულმა ოცნებამ შარლ მიშელის დოკუმენტის ანულირების შემდეგ კვლავ დადო. აქ საკითხი არ ეხება იმას, თუ რამდენად ვენდობით ივანიშვილის მარიონეტების პირობას, ისევე როგორც მრავალ მოქალაქეს, მეც მაქვს საფუძვლიანი მოლოდინი, რომ "ოცნება" აქაც შეეცდება საკითხის ჩაგდებას და მისთვის საკეთილდღეოდ შეტრიალებას, მაგრამ ამჟამად, მანდატების დატოვება და საკონსტიტუციო ცვლილებებისთვის საჭირო 113 დეპუტატის ფიზიკურად არარსებობა პარლამენტში, მათ აძლევს საფუძველს, რომ საკონსტიტუციო ცვლილებების ჩავარდნა მთლიანად ოპოზიციას გადააბრალოს", — აცხადებს ნაკაიძე.

ნაკაიძე ექსპრეზიდენტ მიხეილ სააკაშვილის საკითხსაც ეხება და ამბობს, რომ მისი ჯანმრთელობის მდგომარეობის გაუარესება ან გარდაცვალება იქნება ლაქა, რომელსაც სახელმწიფო ვერ ჩამოირეცხავს. მისივე თქმით, ასე რომ არ მოხდეს, ნებისმიერი გადაწყვეტილების მიღებამდე ყველა ნაბიჯის აწონ-დაწონვაა საჭირო.

1-ელ ნოემბერს ექსპრეზიდენტმა, მიხეილ სააკაშვილმა ოპოზიციას პარლამენტის დატოვებისკენ მოუწოდა. მისი თქმით, პარლამენტმა უკვე დაკარგა სახელისუფლებო პლატფორმის ფუნქცია და იქ ვერანაირ გადაწყვეტილებას ვეღარ მიიღებენ.

31 ოქტომბერს, პარლამენტთან ოპოზიციის მიერ გამართულ აქციაზე მამუკა ხაზარაძემ საპარლამენტო მანდატის დატოვების შესახებ განცხადება გააკეთა. სააკაშვილის მოწოდების შემდეგ იგივე გადაწყვეტილება ნაციონალური მოძრაობის დეპუტატებმა, ნონა მამულაშვილმა, ანა წითლიძემ და ლევან ვარშალომიძემაც მიიღეს. სადეპუტატო მანდატზე უარს ამბობს გირჩი — მეტი თავისუფლების ლიდერი, ზურაბ ჯაფარიძეც, თუმცა მან თქვა, რომ მანდატზე უარი განაცხადა შარლ მიშელის დოკუმენტის ანულირებისთანავე.