ოპოზიციონერი დეპუტატის, სალომე სამადაშვილის განცხადებით, მას არ სჯერა, რომ ხელისუფლება არჩევნების გარეშე შეიცვლება. მისი თქმით, ქვეყანას არასდროს არ ჰქონია მმართველობის ცვლილების სხვა ტიპის გამოცდილება.

"მე არ მივეკუთვნები იმ ადამიანების რიცხვს, რომელსაც სჯერა, რომ ხელისუფლება შეიცვლება არჩევნების გარეშე ამ ქვეყანაში. შეიძლება მწვავე პროტესტის ფონზე ძალიან დიდი ზეწოლის შედეგად საერთაშორისო თანამეგობრობის, მაგრამ არჩევნები უნდა შედგეს, იმიტომ, რომ ჩვენ არ გვაქვს სხვა გამოცდილება. არც ვარდების რევოლუცია არ ყოფილა ელექტორალური პროცესის მიღმა მიმდინარე პოლიტიკური პროცესი, სრულად პროპორციულ სისტემაზე გადასვლა შემდეგი არჩევნებისთვის, ჩემი აზრით, არის სწორედ ის გასაღები, რაც საბოლოოდ ხელისუფლების შეცვლას უზრუნველყოფს", — აცხადებს ის ფორმულასთან.

ამასთან, სამადაშვილი აღნიშნავს, რომ მეტად მნიშვნელოვანი არა ის, თუ ვინ დარჩება პარლამენტში და ვინ დატოვებს მანდატს, არამედ იმ საკონსტიტუციო ცვლილებების განხორციელებაა, რომელიც პროპორციულ სისტემაზე გადასვლასა და ბარიერის დაწევას გულისმხობს.

"პარლამენტში ჩვენ გვაქვს კონკრეტული ამოცანები განსახორციელებელი, მათ შორის, ჩემთვის ყველაზე მნიშვნელოვანი დღეს არის საკონსტიტუციო ცვლილება, რომელიც უნდა მიიღოს ამ პარლამენტმა, იმისთვის, რომ ვადამდელი არჩევნები ჩატარდება იყოს სრულად პროპორციული სისტემით და ასევე, თქვენ იცით რომ ბარიერის დაწევაზეა საუბარი.

მე თუ მკითხავთ, ჩვენი ქვეყნის დემოკრატიისთვის და ამ ქვეყნის უახლოესი მომავლისთვის, ეს საკონსტიტუციო ცვლილებები ბევრად უფრო მნიშვნელოვანია, ვიდრე ის, პარლამენტში ვინ იქნება წარმოდგენილი და ვინ არა. ჩემი ამოცანაა, ამ შემთხვევაში, რომ შევასრულოთ ის პოლიტიკური მთავარი ამოცანა, რაც არის გასაღები ამ ქვეყანაში ხელისუფლების შეცვლის", — ამბობს ის.

რაც შეეხება ლელოს ლიდერის, მამუკა ხაზარაძის მიერ საპარლამენტო მანდატის დატოვებას, სამადაშვილი ამბობს, რომ ეს ყველა დეპუტატის ინდივიდუალური გადაწყვეტილებაა და ამის უფლება ყველა პოლიტიკოსს აქვს. კითხვაზე, შესაძლებელია თუ არა, რომ ფრაქცია დაიშალოს, სამადაშვილი განმარტავს, რომ მისი ფუნქციონირებისთვის 7 წევრია საჭირო, ამ მოცემულობით კი შესაძლოა, ფრაქცია დაიშალოს.

"დღევანდელი მოცემულობით, ფრაქციის შემადგენლობას სჭირდება 7 წევრი პარლამენტში, შესაბამისად, თუ 7 წევრი აღარ იქნება ჩვენს პარლამენტში ფრაქცია დღევანდელი მოცემულობით, შეიძლება დაიშალოს", — თქვა სამადაშვილმა.

გუშინ, 31 ოქტომბერს მამუკა ხაზარაძემ პარლამენტთან მიმდინარე აქციაზე განაცხადა, რომ საპარლამენტო მანდატს ტოვებს. აქციაზე ოპოზიციამ ადგილობრივი თვითმმართველობის არჩევნების შედეგები გააპროტესტა და სამომავლო გეგმების შესახებ განაცხადა. მათ რეგიონებსა და თბილისში მასშტაბური აქციები დააანონსეს.