საპატრიარქო ტახტის მოსაყდრე შიო მუჯირი ანჩისხატთან დაკავშირებით პრემიერმინისტრ ირაკლი ღარიბაშვილს ღია წერილით მიმართავს და მას ანჩისხატის დროულად დაბრუნების საჭიროებას ახსენებს.

"ერთხელ კიდევ შეგახსენებთ ხატის დაბრუნებისთვის სათანადო ნაბიჯების დროულად გადადგმის საჭიროებას", — ნათქვამია წერილში.

ფოტო: საპატრიარქო

ანჩისხატის გადაცემის მოთხოვნით პატრიარქმა, ილია მეორემ ირაკლი ღარიბაშვილს მიმდინარე წლის 2 აგვისტოს მიმართა. წერილის ადრესატი იყო კულტურის მინისტრი თეა წულუკიანიც. ამის ამსახველ წერილს საქართველოს საპატრიარქოს საზოგადოებასთან ურთიერთობის სამსახური ავრცელებს.

წერილში აღნიშნული იყო, რომ ხელისუფლების წინაშე დიდი ხანია, ხატის გადმოცემის საკითხს აყენებენ, რაზეც მათი განცხადებით, "მზაობა ყოველთვის იყო", თუმცა არსებობდა მისი დაცვისთვის სათანადო პირობების შექმნის მოთხოვნა.

ანჩისხატი შალვა ამირანაშვილის სახელობის ხელოვნების სახელმწიფო მუზეუმში ინახება. კულტურის სამინისტროს გადაწყვეტილებით, "მძიმე ინფრასტრუქტურული მდგომარეობის გამო" მუზეუმის ძირითადი შენობა დაიცლება. როგორც უწყებაში თქვეს, მუზეუმი მართვის განსაკუთრებულ რეჟიმზე გადადის. ამასთან, გავრცელდა ინფორმაცია ხელოვნების მუზეუმის დანგრევასთან დაკავშირებით, რასაც სამინისტრომ სიცრუე უწოდა და განაცხადა, რომ "სიცრუის ავტორები და მათ ზურგს ამოფარებული სხვა პირები ამ გზით საკუთარი უმოქმედობით გამოწვეული სავალალო შედეგების გადაფარვას ცდილობენ".