ჯანდაცვის მინისტრი, ეკატერინე ტიკარაძე აცხადებს, რომ დამატებითი შეზღუდვების დაწესება ამ ეტაპზე არ განიხილება. ტიკარაძე ეხმაურება ბოლო დღეებში გავრცელებულ ინფორმაციას, რომ შესაძლოა შეზღუდვები გამკაცრდეს და ამბობს, რომ ეს საზოგადოების შეცდომაში შეყვანას ემსახურება.

"დამატებითი შეზღუდვების დაწესების აუცილებლობა ამ ეტაპზე არ განიხილება. თუ ვინმე ავრცელებს, რომ დამატებითი შეზღუდვების დაწესება იგეგმება, ეს არის სიცრუე და მოსახლეობის შეცდომაში შეყვანას ემსახურება. როგორც ჩანს, ამას გარკვეული ჯგუფები მიზანმიმართულად აკეთებენ", — განაცხადა ეკატერინე ტიკარაძემ.

ტიკარაძის თქმით, ეპიდვითარება საყურადღებოა, თუმცა სწრაფი ზრდის ტენდენცია არ არსებობს.

"საქართველოში კოვიდ-19 ის გავრცელების კუთხით ეპიდემიური სიტუაცია საყურადღებო რჩება. აღსანიშნავია, რომ ოქტომბრის დასაწყისიდან შემთხვევების მატებას მეტად ლოკალიზებული ხასიათი ჰქონდა და უპირატესად შეეხო იმ რეგიონებს, სადაც აცრილი მოსახლეობის რაოდენობა სხვებთან შედარებით მცირეა, მ.შ. კახეთი და იმერეთი. ამ ეტაპზე შემთხვევების საშუალო დღიური მაჩვენებელი 4000-ის ფარგლებშია და სწრაფი ზრდის ტენდენციები არ იკვეთება", — განაცხადა ჯანდაცვის მინისტრმა.

15 ოქტომბერს, ჯანდაცვის მინისტრის მოადგილემ თამარ გაბუნიამ განაცხადა, რომ შეზღუდვებს არ აქვს გრძელვადიანი შედეგი, ამიტომ, საჭიროა ვაქცინაციის გააქტიურება.