ქართული ოცნების თავმჯდომარე, ირაკლი კობახიძე აცხადებს, რომ პარტიის დამფუძნებლის, ბიძინა ივანიშვილის პოლიტიკიდან წასვლით გამოწვეული დანაკლისის შევსება მხოლოდ გუნდის ერთიანობით იყო შესაძლებელი და "ოცნებამ" ეს ერთიანობა შეძლო. მისი თქმით, არჩევნებში გამარჯვება სწორედ ამის დამსახურებაა.

"შეგახსენებთ, რომ ჩვენთვის ეს იყო პირველი არჩევნები, რომელიც ბიძინა ივანიშვილის პოლიტიკიდან გასვლის შემდეგ ჩავატარეთ. ასეთი მასშტაბის დანაკლისის შევსება მხოლოდ გუნდის ერთიანობით იყო შესაძლებელი და ჩვენ სწორედ ეს შევძელით. დღეს ქართული ოცნება არის სახელმწიფოებრივად მოაზროვნეების გუნდი, რომელიც ყველა გამოწვევას ერთიანობით უპირისპირდება. სწორედ ეს ერთიანობა გახდა ჩვენი შთამბეჭდავი გამარჯვების ერთ-ერთი საფუძველი", — განაცხადა კობახიძემ.

პარტიის თავმჯდომარემ განსაკუთრებული მადლობა გადაუხადა კამპანიის ლიდერს, პრემიერმინისტრ ირაკლი ღარიბაშვილს. მისი თქმით, ქართული ოცნების გამარჯვებაში განსაკუთრებული როლი სწორედ ღარიბაშვილმა შეასრულა.

ცენტრალურმა საარჩევნო კომისიამ უკვე ყველა ქალაქსა და თვითმართველ თემში დათვალა მერობის კანდიდატებისთვის მიცემული ხმების 100%. შედეგების მიხედვით, წალენჯიხა ერთადერთი მუნიციპალიტეტია, სადაც ნაციონალური მოძრაობის კანდიდატი იგებს, სხვა ყველგან — ქართული ოცნება. ოპოზიციამ აქცია და გეგმის წარდგენა დააანონსა.

ნახეთ არჩევნების მეორე ტურის შედეგები დეტალურად On.ge-ზე: