ლელოს ერთ-ერთი ლიდერი, მამუკა ხაზარაძე ამბობს, რომ ქართული ოცნება თბილისსა და სხვა დიდ ქალაქებს აგებს. როგორც თავად ამბობს, იგეგმება კარუსელის დატრიალება და ლელო მზად არის, გავიდეს უბნებზე.

"გვაქვს ინფორმაცია, იციან რა, აგებენ თბილისს, ახლა იწყებენ კარუსელის დატრიალებას და თავიდან უკვე ხმამიცემული ადამიანების უბნებზე მიყვანას. ძალიან ფხიზლად და მაქსიმალურად ყურადღებით ვიყოთ. მოვუწოდებ ყველას, მსგავსი ფაქტი სასწრაფოდ გამოვავლინოთ და არ დავუშვათ არჩევნების გაყალბება", — თქვა მამუკა ხაზარაძემ ფორმულასთან.

ამავე თემაზე გააკეთეს ოფიციალური განცხადება პარტია ლელოში და თქვეს, რომ 8 საათამდე და შემდეგ უბნების დახურვისას მნიშვნელოვანი იქნება ხმების დაცვა.

დღეს, 30 ოქტომბერს ადგილობრივი თვითმმართველობის არჩევნების მეორე ტური იმართება. მერი 15 თვითმმართველ თემსა და 5 თვითმმართველ ქალაქში, მათ შორის, თბილისში აირჩევა. გარდა ამისა, მეორე ტური გაიმართება 24 საარჩევნო ოლქში, რომლის შედეგად აირჩევა 42 მაჟორიტარი.