ქართველი დიზაინერი განაგრძობს მოდის სამყაროს მწვერვალების დაპყრობას.

ჯერ იყო და დემნა გვასალია ამერიკულმა მოდის საბჭომ 2021 წლის დაჯილდოების ფინალისტებს შორის დაასახელა: CFDA Awards-ზე ქალის სამოსის წლის საუკეთესო საერთაშორისო დიზაინერის ნომინაციაში გამარჯვებისთვის ბალენსიაგას სახელით იბრძოლებს.

მასთან ერთად ამავე კატეგორიაში წარდგენილნი არიან Prada-ს მიუჩია პრადა და რაფ სიმონსი, Jacquemus-ს სიმონ ჟაკმუსი, Bottega Veneta-ს დენიელ ლი და Valentino-ს პიერპაოლო პიჩოლი.

სულ ცოტა ხნის წინ ასევე ცნობილი გახდა ბრიტანული მოდის გავლენიანი დაჯილდოების ნომინანტთა ვინაობა და დემნა გვასალია ამჯერადაც მოხვდა ფინალისტებს შორის: ის წლის საუკეთესო დიზაინერის ტიტულის მოპოვებისთვის იბრძოლებს.

მასთან ერთად ამ ნომინაციაში წარდგენილნი არიან დენიელ ლი Bottega Veneta-სთვის, ჯონათან ანდერსონი JW Anderson & LOEWE-სთვის, კიმ ჯონსი Dior Men & Fendi-სთვის და მიუჩია პრადა და რაფ სიმონსი Prada-სთვის.

ამერიკული CFDA Awards-ის წლევანდელი ცერემონია ნიუ-იორკში 10 ნოემბერს გაიმართება, ბრიტანული მოდის დაჯილდოების გამარჯვებულებს კი 29 ნოემბერს ლონდონში გამოაცხადებენ.

ისღა დაგვრჩენია, მოდის დიზაინის ქართველ ინოვატორს წარმატებები ვუსურვოთ.

ასევე იხილეთ: