დროას ლიდერი ელენე ხოშტარია ამბობს, რომ პრემიერმინისტრმა ირაკლი ღარიბაშვილმა პირდაპირ თქვა ყოფილ პრეზიდენტზე მიხეილ სააკაშვილზე მოკვდესო. მას ასევე აინტერესებს, სად წერია კანონში "მიბრძანდით, იკალით თავიო".

"ღიად თქვა ღარიბაშვილმა, სააკაშვილზე მოკვდესო. პოლიტიკურად ყველაფერი გასაგებია. აი, კანონში სად ნახა, მიბრძანდით, იკალით თავიო, ეგ არ ვიცი. ბევრ ქვეყანაში კანონით თვითმკვლელობა ჯარიმით ისჯება. ესეიგი ამხელა განცხადებას აკეთებს და იქაც ტყუილზე და უვიცობაზე დაფუძნებულს", — წერს ელენე ხოშტარია Facebook გვერდზე.

გუშინ, 28 ოქტომბერს ექსპრეზიდენტ მიხეილ სააკაშვილის შიმშილობაზე საუბრისას პრემიერმინისტრმა ირაკლი ღარიბაშვილმა თქვა, რომ ადამიანებს თვითმკვლელობის უფლება აქვთ და სახელმწიფო ამაზე ვერ აიღებს პასუხისმგებლობას.

მიხეილ სააკაშვილი პირველ ოქტომბერს, მას შემდეგ დააკავეს, რაც სოციალურ ქსელში ვიდეო გაავრცელა, სადაც ჩანდა, რომ საქართველოში იმყოფებოდა. ის 29 დღეა შიმშილობს.