ლელოს წევრის, ანა ნაცვლიშვილის განცხადებით, პრემიერმინისტრ ირაკლი ღარიბაშვილის განცხადება იმის შესახებ, რომ "ადამიანებს თვითმკვლელობის უფლება აქვთ", სამართლებრივად სრული სიცრუე, პოლიტიკურად კი სრული თვითილუსტრაციაა.

"სამართლებრივი თვალსაზრისით, ეს არის სრული ტყუილი, პიქირით, სახელმწიფოს ეკისრება აბსოლუტური ვალდებულება პატიმრის სიცოცხლისა და ჯანმრთელობის დაცვაზე და ეს არის, როგორც ჩვენი კანონმდებლობით, ასევე ყველა საერთაშორისო სტანდარტით. პოლიტიკური თვალსაზრისით, ეს არის სრული თვითლუსტრაცია, ვინაიდან, ეს განცხადება კიდევ ერთხელ აჩვენებს, რომ მიმდინარე პროცესს არაფერი აქვს საერთო სამართალთან და სამართლიანობის აღდგენასთან, არამედ, ეს არის რეალური რევანში პოლიტიკური ოპონენტის წინააღმდეგ", — ამბობს ნაცვლიშვილი TV პირველთან.

გუშინ, 28 ოქტომბერს ექსპრეზიდენტ მიხეილ სააკაშვილის შიმშილობაზე საუბრისას პრემიერმინისტრმა ირაკლი ღარიბაშვილმა თქვა, რომ ადამიანებს თვითმკვლელობის უფლება აქვთ და სახელმწიფო ამაზე ვერ აიღებს პასუხისმგებლობას.

მიხეილ სააკაშვილი პირველ ოქტომბერს, მას შემდეგ დააკავეს, რაც სოციალურ ქსელში ვიდეო გაავრცელა, სადაც ჩანდა, რომ საქართველოში იმყოფებოდა. ის 29 დღეა შიმშილობს.