"მე ნამდვილად არ მაქვს სურვილი, რომ ჩვენ ვიგლოვოთ ახალგაზრდა პრეზიდენტი" — ეს განცხადება ფოთისა და ხობის მიტროპოლიტმა, გრიგოლ ბერბიჭაშვილმა ექსპრეზიდენტ მიხეილ სააკაშვილთან ციხეში შეხვედრის შემდეგ გააკეთა.

მისი თქმით, სააკაშვილი სუსტად გრძნობს თავს, თუმცა მხნეობას არ კარგავს. კითხვაზე, რა ცვლილებები შეამჩნია მან სააკაშვილს, ის პასუხობს:

"ეტყობა, სახის ფერზეც ეტყობა, მოძრაობა ცოტა შენელებულია, თქვენ იცით ახლა, როგორ ტყვიასავით არის".

მისივე თქმით, სააკაშვილი არ არის ჩვეულებრივი პატიმარი და წინააღმდეგ შემთხვევაში, ამ საკითხს ასეთი საერთაშორისო გამოხმაურება არ მოჰყვებოდა. მიტროპოლიტი დასძენს, რომ სააკაშვილის ბედი გარკვეულწილად სახელმწიფოს ბედსაც უკავშირდება. მისი თქმით, აუცილებელია, ზღვარი გაივლოს პირად წყენასა და სახელმწიფოებრივ ინტერესებს შორის.

"ხშირად გვესმის საუბარი, რომ პრეზიდენტი სააკაშვილი ჩვეულებრივი პატიმარია, მე ასე ვიტყოდი, რომ კანონის წინაშე ყველა თანასწორია და უნდა იყოს კიდევაც თანასწორი, მაგრამ ის, რომ ჩვეულებრივი პატიმარია... ჩვეულებრივი პატიმრების მიმართ საერთაშორისო ყურადღება არ არის მოპყრობილი, ესე იგი, არაჩვეულებრივი პატიმარია", — ამბობს ის.

რაც შეეხება შიმშილობას, სასულიერო პირი აცხადებს, რომ სააკაშვილს ამ თემაზე საუბარიც კი არ სურს.

"მან იცის, რატომ შიმშილობს და მისი საუბრიდანაც ვნახე, რომ ამ თემაზე საუბარს არ აქვს არანაირი მნიშვნელობა. მიზეზთა გამო და ზოგადად ასე ბრძანა მან, გარკვეულ მიზეზთა გამო, ის არ აპირებს ექიმების დახმარებაზე...", — აცხადებს ბერბიჭაშვილი.

მიტროპოლიტი გრიგოლი საყოველთაო შერიგების იდეასაც შეეხო და აღნიშნა, რომ ეს არ განხორციელდება მანამ, სანამ საზოგადოებაში ღირებულებითი შეუთანხმებლობა და პოლარიზაცია არ დასრულდება.

ციხეში შესვლამდე ბერბიჭაშვილმა განაცხადა, რომ სააკაშვილს წმინდა წერილი უნდა გადასცეს. მან ასევე თქვა, რომ ციხეში პატიმრის მონახულება სასულიერო პირის როგორც უფლება, ასევე ვალდებულებაცაა.

აქამდე, მიხეილ სააკაშვილს ციხეში სხვა სასულიერო პირებიც შეხვედრიან. 13 ოქტომბერს მის მოსანახულებლად ახალქალაქის, კუმურდოს და კარის მიტროპოლიტი, ნიკოლოზ ფაჩუაშვილი შევიდა. ექსპრეზიდენტთან შესახვედრად რუსთავის მე-12 სასჯელაღსრულებით დაწესებულებაში 15 ოქტომბერს მარგვეთისა და უბისის ეპისკოპოსი, მელქისედეკიც იმყოფებოდა.

მანამდე, 7 ოქტომბერს მიხეილ სააკაშვილს პატრიარქის მდივანი, მიქაელ ბოტკოველი შეხვდა.

აღსანიშნავია, რომ მიხეილ სააკაშვილის გათავისუფლების მოთხოვნით შექმნილ პეტიციას რამდენიმე სასულიერო პირმა მოაწერა ხელი, თუმცა, მათ შორის მიტროპოლიტი გრიგოლ ბერბიჭაშვილი არ არის.

მიხეილ სააკაშვილი პირველ ოქტომბერს დააკავეს. ის 29-ე დღეა შიმშილობს.