რუს ოპოზიციონერს, ალექსეი ნავალნის 26 მარტს, ანტიკორუფციულ აქციაზე, პოლიციის მითითებების დაუმორჩილებლობისთვის 15-დღიანი პატიმრობა მიესაჯა.

ნავალნი ერთ-ერთია ასობით ადამიანს შორის, რომელიც ქვეყნის მასშტაბით პროტესტთან კავშირის გამო დააკავეს.

BBC-ის ცნობით, მანამდე, მოსკოვის სასამართლომ ნავალნი 20 ათასი რუბლით ($350) დააჯარიმა აკრძალული აქციის ორგანიზებისთვის.

დღეს, 27 მარტს კრემლმა ოპოზიცია კანონდარღვევის წახალისებასა და ძალადობის პროვოკაციაში დაადანაშაულა. პრეზიდენტის წარმომადგენლის განცხადებით, აქციაზე დასასწრებად ზოგ ახალგაზრდას ფული გადაუხადეს.

ალექსეი ნავალნი პრემიერ-მინისტრს დიმიტრი მედვედევს კორუფციაში სდებს ბრალს, რაც კვირას გამართული აქციების მთავარი მიზეზი იყო. პროტესტში ქვეყნის მასშტაბით ათასობით დემონსტრანტმა მიიღო მონაწილეობა. აქციები გაიმართა სანქტ-პეტერბურგში, ვლადივოსტოკში, ნოვოსიბირსკში, ტომსკში, მოსკვოსა და სხვა ქალაქებში.