კომპანია Spanx-ის დამფუძნებელმა და დირექტორმა ცოტა ხნის წინ საინვესტიციო კომპანია Blackstone-თან გაფორმებული $1,2-მილიონიანი ხელშეკრულება და წარმატებული პარტნიორობა განსაკუთრებულად აღნიშნა. სარა ბლეიკლიმ თითოეულ თანამშრომელს $10 000 და ნებისმიერი მიმართულებით თვითმფრინავის პირველი კლასის 2 ბილეთი გადასცა.

კომპანია Spanx, ძირითადად, ტანზე მჭიდროდ მომდგარი და კომფორტული საცვლების წარმოებითაა ცნობილი. კომპანიის დამფუძნებელი სარა ბლეიკლი თვლის, რომ ის წარმატებას თანამშრომლების გარეშე ვერ მიაღწევდა, ამიტომ მათი გახარება გადაწყვიტა.

"ძალიან მინდა, რომ თითოეულმა დასაქმებულმა ეს შემთხვევა თავისებურად იზეიმოს და ისეთი მოგონებები შექმნას, რომელიც მთელი ცხოვრების განმავლობაში ემახსოვრება. გაუმარჯოს ჯადოსნურ 21 წელსა და კიდევ უამრავ მომავალ წარმატებას", — წერს სარა.

სარამ განვლილი გზა გაიხსენა და თანამშრომლების გარდა, მადლობა ყველა იმ ქალს გადაუხადა, რომელიც გზის გაკვალვაში დაეხმარა, მათ შორის — დედასა და ბებიას. მისი თქმით, თავიდან ამ იდეის წარმატება სხვებს სასაცილოდაც არ ჰყოფნიდათ, თუმცა ბიზნესის "მასკულინურ სივრცეში" ქალებისთვის საოცარი პროდუქციის შექმნა მაინც მოახერხა.

"ჩემი ცხოვრებისეული დევიზია, რომ რაც უფრო მეტ გამოცდილებას აგროვებ, მით მეტის შეთავაზება შეგიძლია სხვებისთვის", — წერს სარა.

ვიდეოში საჩუქრებით გახარებული თანამშრომლების რეაქციებიც ჩანს, რომლებიც ბედნიერებისგან ტირიან და სამომავლო გეგმებზეც საუბრობენ.

სარას წარმატება მოდელმა კარლი კლოსმა და მსახიობმა რიზ უიზერსპუნმაც მიულოცეს.

"შენ ჩვენი შთაგონების წყარო ხარ. გილოცავ შენც და Spanx-ის გუნდსაც. მადლობა ყველაფრისთვის, რასაც პირდაპირი და გადატანითი მნიშვნელობით მილიონობით ქალის განვითარებისა და მხარდაჭერისთვის აკეთებ", — ასე მიულოცა კარლი კლოსმა კომპანიას მიღწეული წარმატება.