ქართული ოცნების აღმასრულებელი მდივანი, მამუკა მდინარაძე ამბობს, რომ დღეს დაგეგმილ აქციაზე აქტივისტებისა და მედიის წარმომადგენლების მხრიდან მოსალოდნელია მცირე პროვოკაციები და ისინი ეცდებიან შექმნან დაძაბულობის ფონი.

"მოსალოდნელია, რომ მთელი რიგი პარტიული აქტივისტებისა და სამწუხაროდ, მათ შორის, მედიის წარმომადგენლების მხრიდანაც ტრადიციულად იქნება მცირე პროვოკაციები, ეცდებიან შექმნან დაძაბულობის ფონი, თუმცა ყველა ჩვენს მხარდამჭერს ვთხოვ და მოგიწოდებთ, ნუ აჰყვებით ამ მდარე პროვოკაციებს და დარწმუნებული ვარ, ისინი ვერ შეძლებენ ჩვენი შეკრებისათვის ჩრდილის მიყენებას და მათთვის სასურველი სურათის შექმნას", — აცხადებს მდინარაძე.

ქართულმა ოცნებამ წინასაარჩევნო აქცია დააანონსა და მას "პარტიის მხარდამჭერების შემაჯამებელი საარჩევნო შეკრება" უწოდა. პარტიის თავმჯდომარის, ირაკლი კობახიძის განცხადებით, ისინი ოთხშაბათს 17:00 საათზე თავისუფლების მოედანზე შეიკრიბებიან და კიდევ აჩვენებენ, "როგორია ქართველი ხალხის ძალა, რომელიც იბრძვის ბოროტების საბოლოოდ დასამარცხებლად".