"დავრწმუნდი, რომ შეიძლება, მილანშიც იცხოვრო რამდენიმე წელი, მაგრამ მაინც ის დარჩე, რაც ხარ", — ასე ეხმაურება ნაციონალური მოძრაობის თავმჯდომარე, ნიკა მელია თბილისის მერობის კანდიდატს, კახა კალაძეს, რომელმაც დღეს მელიას ფეხბურთის თამაშის პაროდია გააკეთა.

"წარმოუდგენელია. დღეს 6 საათის განმავლობაში ჩვენ მართლაც ფეხით შემოვიარეთ შინდისი, ტაბახმელა, ოქროყანა, კოჯორი, კიკეთი, ფონიჭალა და კრწანისი. მე და მამუკა ბავშვებს შევხვდით და ბავშვებმა ფოტოები გადაიღეს ჩვენთან ერთად, უბრალოდ როგორც ხდება, რამდენჯერმე აკენწლეს. საერთოდ არ გამხსენებია არც ბატონი კალაძე, არავინ. როგორც ხდება, სიტუაციურად. სიმართლე გითხრათ, ეს რაც გაუკეთებია ბატონ კალაძეს, ძალიან გამიკვირდა და კიდევ ერთხელ დავრწმუნდი, რომ შეიძლება, მილანშიც იცხოვრო რამდენიმე წელი, სხვა ქალაქებშიც ევროპულში, მაგრამ მაინც ის დარჩე, რაც ხარ.

წარმოუდგენელია, რატომ ჰქონდა ვინმეს მოლოდინი, რომ მე ვეჯიბრები კალაძეს აკენწვლაში? კი ბატონო, თუ დამიწუნა მან მე სპორტული კლასი და საერთოდ არ ვეჯიბრები, არ მოვერიდები იმის თქმას, რომ ეს არის უმნიშვნელო, ჩემთვის მნიშვნელოვანია პოლიტიკური კლასი, მაგრამ ამ კონკრეტულ შემთხვევაში მე დავინახე ეს ადამიანი ძალიან პატარა", — თქვა მელიამ TV პირველის ეთერში.

დღეს ოპოზიცური პარტიების ლიდერებმა წინასაარჩევნო შეხვედრებისას ფეხბურთი ითამაშეს, რისი ამსახველი ვიდეოც სოციალურ ქსელში გავრცელდა. მოგვიანებით, კახა კალაძე ნუცუბიძის ფერდობზე საქართველოს ფეხბურთის ფედერაციის საფეხბურთო ცენტრის გახსნის ღონისძიებას დაესწრო, სადაც ფეხბურთი ითამაშა. მან მელიას ფეხბურთის თამაში დაუწუნა და მისი პაროდია გააკეთა.