გაერთიანებული სამეფოს შემდეგ, ზღაპრის სიუჟეტი ამჯერად ამომავალი მზის ქვეყანაში განვითარდა.

იაპონიის პრინცესა მაკო კოლეჯის პერიოდის შეყვარებულზე, კეი კომუროზე, დაქორწინდა. რადგან მაკოს რჩეული არასამეფო წარმომავლობისაა, მასაც მოუწია სამეფო ტიტულის დათმობა.

იაპონური კანონის მიხედვით, სამეფო ოჯახის წევრი კაცებისგან განსხვავებით, ქალებს ტიტული ჩამოერთმევათ, თუკი ისინი არასამეფო წარმომავლობის ადამიანზე დაქორწინდებიან.

მაკომ კი არა მხოლოდ ტიტული დათმო, სამეფო ქორწილის ტრადიციულად გადახდაზე და ოჯახის მიერ შემოთავაზებულ ფინანსურ დახმარებაზეც უარი თქვა. ამგვარად, იგი იაპონიის სამეფო ოჯახის პირველი წევრი ქალი გახდა, რომელიც ასე მოიქცა.

ფოტო: AP

კომურო აშშ-ში მუშაობს, ამიტომ წყვილიც იქ გეგმავს საცხოვრებლად გადასვლას. ამ ნაბიჯმა ბევრს პარალელი გაავლებინა ბრიტანეთის სამეფო ოჯახის წევრებთან, პრინც ჰარისთან და მეგან მარკლთან, რომლებმაც ასევე დათმეს ტიტულები და აშშ-ში გადავიდნენ საცხოვრებლად. ამდენად, რა გასაკვირია, რომ მაკოსა და კეის უკვე შეარქვეს "იაპონელი ჰარი და მეგანი".

მარკლის მსგავსად, კომუროც გაცხარებული მითქმა-მოთქმისა და მწვავე კრიტიკის სამიზნედ იქცა, როცა მისი და მაკოს ურთიერთობის შესახებ ცნობილი გახდა. ერთ-ერთი მიზეზი მისი ვარცხნილობა იყო — "ცხენის კუდად" შეკრული თმა პრინცესის საქმროსთვის ბევრმა შეუფერებლად მიიჩნია.

თუმცა, ქორწინების მოწინააღმდეგეები არა მხოლოდ კრიტიკით შემოიფარგლნენ, საპროტესტო მსვლელობაც კი მოაწყვეს.

ფოტო: Reuters

მოგვიანებით, პრესკონფერენციაზე გამოსვლისას, პრინცესა მაკომ მათ, "ვინც თავისი ქორწინებით შეაწუხა", მოუბოდიშა, გულშემატკივრებს კი მადლობა გადაუხადა.

"ჩემთვის კეი შეუცვლელია, ქორწინება კი ჩვენთვის გარდაუვალი იყო", — დასძენს მაკო.

"მაკო მიყვარს. მხოლოდ ერთხელ ვცხოვრობთ და მინდა, ეს სიცოცხლე მათთან გავატაროთ, ვინც გვიყვარს", — ამბობს კეი, — "ვწუხვარ, რომ ცრუ ბრალდებების გამო, მაკო მენტალურად და ფიზიკურად ცუდ სიტუაციაში აღმოჩნდა".

ბრალდებები კი, რომლებსაც კომურო ახსენებს, ძირითადად მასსა და თავისი ოჯახის ფინანსურ საქმეებს მიემართება. როცა კომურო და ყოფილი პრინცესა 2017 წელს დაინიშნნენ, ქორწილი გადაიდო, კეის დედა კი მედიის ყურადღების ცენტრში მოექცა — მას ყოფილი საქმროს ფულის მითვისებაში ადანაშაულებდნენ. ამ ორ ფაქტს შორის კავშირს სამეფო ოჯახი უარყოფს, თუმცა, პრინცმა ფუმიჰიტომ მაინც განაცხადა, რომ ეს პრობლემები ქორწინებამდე უნდა მოგვარებულიყო.

აღსანიშნავია, რომ ადგილობრივი მედიის მიერ ამ ამბის წლების განმავლობაში გაშუქების გამო, პრინცესას პოსტტრავმული სტრესული აშლილობაც ჰქონდა.

ყველაფრის მიუხედავად, ზოგი ვარაუდობს, რომ იაპონელების პროტესტის რეალური მიზეზი მათი კონსერვატიული დამოკიდებულებებია. ამის გამო, ისინი კომუროს სამეფო ოჯახის წევრისთვის შეუფერებელ პარტნიორად მიიჩნევენ.