ცოტა ხნის წინ სერიალების, განსაკუთრებით კი Friends-ის გულშემატკივრებისთვის სამწუხარო ინფორმაცია გავრცელდა: საკულტო სიტკომში განთერის, Central Perk-ის მიმტანის როლის შემსრულებელი ჯეიმს მაიკლ ტაილერი 59 წლის ასაკში გარდაიცვალა.

2021 წლის ივნისში NBC-თან მიცემულ ინტერვიუში მსახიობმა განაცხადა, რომ 2018-ში პროსტატის მეოთხე სტადიის კიბო დაუდგინდა და ბოლო წლებში ამ დიაგნოზს ებრძოდა.

რა თქმა უნდა, ჯეიმსის გარდაცვალებამ გულშემატკივრების გარდა, თავად მეგობრების მსახიობებიც დაამწუხრა.

"შენ გარეშე Friends ისეთი ვერ იქნებოდა, როგორიც არის. მადლობა იმ სიცილისთვის, რომელიც სერიალსა და ჩვენს ცხოვრებაში მოიტანე. ძალიან მოგვენატრები", — ემშვიდობება ჯენიფერ ენისტონი მსახიობს.

"უდიდესი მადლიერება, რომელიც ოთახში შემოგქონდა და გადასაღებ მოედანზე გვიჩვენებდი, სწორედ ის მადლიერებაა, რომელსაც შენი გაცნობის გამო ვგრძნობ. მშვიდად განისვენე, ჯეიმს", — ვკითხულობთ კორტნი კოქსის პოსტში.

"ჯეიმს მაიკლ ტაილერ, მოგვენატრები. მადლობა, რომ ჩვენ გვერდით იყავი", — წერს ლიზა კუდროუ.

"ერთად ბევრი ვიცინეთ, მეგობარო. მოგვენატრები. მშვიდად განისვენე, მეგობარო", — ვკითხულობთ მეთ ლებლანკის ინსტაგრამზე.

გასულ მაისს ჯეიმს მაიკლ ტაილერმა სიტკომის დანარჩენ ვარსკვლავებთან ერთად მეგობრების სპეციალურ ეპიზოდში მიიღო მონაწილეობა, თუმცა ჯანმრთელობის მდგომარეობის გამო ფიზიკურად დასწრება ვერ შეძლო და Zoom-ის საშუალებით ჩაერთო შოუს.

"ეს გულწრფელად ჩემი ცხოვრების ყველაზე დასამახსოვრებელი ათი წელი იყო", — განაცხადა მან მაშინ იმ ლეგენდარულ სერიალზე საუბრისას, რომლის სახასიათო ნაწილი თავადაც იყო.

მოგვიანებით ტაილერმა იმაზეც ისაუბრა, თუ რატომ არ გაამხილა უფრო ადრე საჯაროდ თავისი დიაგნოზი:

"არ მინდოდა, ისეთი რეაქცია ყოფილიყო: ოჰ, განთერს თურმე კიბო აქვს".

ჯეიმს მაიკლ ტაილერის გარდაცვალებას მეგობრების ტვიტერის ოფიციალურ ანგარიშზეც გამოეხმაურნენ:

"Warner Bros. Television მწუხარებას გამოხატავს ჯეიმს მაიკლ ტაილერის გარდაცვალების გამო, რომელიც ყველასთვის საყვარელი მსახიობი და მეგობრების ოჯახის განუყოფელი ნაწილი იყო", — ვკითხულობთ ტექსტში.