დღეს ინტერნეტში ახალი ქართული აპლიკაცია გამოჩნდა - iShare.ge, რომლის იდეაც სულ ცოტა ხნის წინ ფეისბუკზე დაიბადა. მისი ავტორი ეროვნული ბანკის ყოფილი დირექტორი გიორგი ქადაგიძეა.

აპლიკაციის საშუალებით მომხმარებლები პრეპარატებს ერთმანეთს გაუცვლიან. ქადაგიძის თქმით, პროექტი სოციალურია და კომერციული მიზნები არ აქვს.

"ალბათ, ყველას გვაქვს სახლში დიდი ყუთი ისეთი მედიკამენტებით, რომლებსაც აღარ ვიყენებთ და გადაგდებაც გვენანება, სხვებისთვის კი ხშირად ასეთი წამლები ხელმისაწვდომი არაა. თქვენთვის გამოუსადეგარი ბევრი წამალი შეგიძლიათ განათავსოთ ჩვენს ვებგვერდზე და ამით სხვა ადამიანებს დაეხმაროთ. ამავე პრინციპით, საიტის დახმარებით შეგიძლიათ მოითხოვოთ თქვენთვის საჭირო პრეპარატები" - წერია აპლიკაციის ფეისბუკ გვერდზე.

საიტით სარგებლობა სრულიად უფასოა, მისი გვერდი კი ღიაა ყველა მომხმარებლისთვის და პასუხებს გასცემს მათ, ვისაც აპლიკაციის გამოყენებისას კითხვები დაებადება.