ერთიანი ნაციონალური მოძრაობის ინფორმაციით, გუშინ ღამით ხობში ორი ყოფილი ძალოვანის საცხოვრებელი სახლები გაჩხრიკეს და ერთ-ერთი მათგანი დააკავეს.

ენმ-ის წევრის, ანა წითლიძის განცხადებით, დაკავებულია ლექსო რაფავა, რომელსაც მისი თქმით, იარაღი და ხელყუმბარა ჩაუდეს. წითლიძე ამბობს, რომ სპეცოპერაციას ხელმძღვანელობდნენ შინაგან საქმეთა მინისტრის მოადგილე, შალვა ბედოიძე და კრიმინალური პოლიციის დეპარტამენტის დირექტორი, მამუკა ჭელიძე.

ჩხრეკა ჩატარდა ყოფილი ძალოვანის, რუსლან შამახიას სახლშიც. შამახიას თქმით, წაღებულია მის სახელზე გაფორმებული იარაღი.

"ჩვეულებრივად შეცვივდნენ, არიეს-დარიეს სახლი, სეიფი გააღეს და მქონდა გაფორმებული ჩემზე თოფები, რომლებიც, როგორც მეუღლე მეუბნება, წაიღეს. [...] ჩვენ წინააღმდეგ დაწყებულია მასიურად დაშინების კუთხით, დაჭერის კუთხით, რაც ხდება, ეს, დარწმუნებული იყავით, რომ არის დავალება კრიმინალების და პარტია ქართული ოცნების", — ამბობს მთავარ არხთან შამახია.

ენმ-ის წევრმა, თენგიზ გუნავამ განაცხადა, რომ ყოფილი ძალოვანები არჩევნების პირველ ტურში ხელს უშლიდნენ გაყალბებას და მათი დევნა შსს-მ ამ მიზეზით დაიწყო.

შსს-ს ცენტრალური კრიმინალური პოლიციის დეპარტამენტის დირექტორმა, მამუკა ჭელიძემ ჟურნალისტების კითხვას მომხდართან დაკავშირებით უპასუხა, რომ სტანდარტული საპოლიციო ღონისძიებები განხორციელდა. სხვა კომენტარს ამ ეტაპზე შსს არ აკეთებს.

"მემგონი თბილისში ვარ, სტანდარტული საპოლიციო ღონისძიებები განხორციელდა რეგიონში, არაფერი განსაკუთრებული, ინფორმაციას გავავრცელებთ", — განაცხადა ჭელიძემ.