რამდენიმე ფეისბუკ გვერდმა, მათ შორის ულტრანაციონალისტურმა ორგანზიაციამ ქართულმა ძალამ ფეისბუკზე უცხოელის ფოტოს გამოაქვეყნა. მას სახეზე დაზიანებები აღენიშნება.

ფოტოს მინაწერში დისკრიმინაციული ტერმინებითაა აღწერილი მისი ცემის მიზეზი, ასევე დისკრიმინაციულ კონტექსტშია ნახსენები მისი ეროვნება, პოსტზე კი სიძულვილის ენისა და მუქარის შემცველი კომენტარებია.

ამას გარდა, ერთ-ერთი გვერდი, ანტილიბერალური კლუბი აქვეყნებს ვიდეოს, სადაც ჩანს, რომ ფოტოზე აღბეჭდილი, სავარაუდოდ, არაფხიზელ მდგომარეობაში მყოფი სხვა ქვეყნის მოქალაქე პირი ეკლესიის ჭიშკარს ფეხს ურტყამს, ცოტა ხანში მასთან მიდის რამდენიმე ადამიანი შეძახილებით "მოდი აქ", "იძი სუდა", რის შემდეგაც ჩანს ძირს დაგდებული ახალგაზრდა. ვიდეო აქ მთავრდება.

როგორც შსს-ში On.ge-ს უთხრეს, გამოძიება ხულიგნობის მუხლით დაიწყო და უცხოეთის მოქალაქე, რომლის ფოტოც ქართულმა ძალამ გამოაქვეყნა, სასამართლომ 100 ლარით დააჯარიმა ეკლესიის მიმდებარე ტერიტორიაზე ხულიგნობისთვის:

"დღეს დილით საპატრულო პოლიციამ მიიღო შეტყობინება, რომ ეკლესიის მიმდებარე ტერიტორიაზე პიროვნება არღვევდა საზოგადოებრივ წესრიგს და ხულიგნობდა. ადგილზე გამოცხადდა საპატრულო პოლიციის ეკიპაჟი. იგი დაკავებული იქნა ადმინისტრაციული სამართალდარღვევის კოდექსის 166-ე მუხლით, რომელიც გულისხმობს წვრილმან ხულიგნობას. იგი გადაყვანილ იქნა სასამართლოში, სასამართლომ აღნიშნული ფაქტი სამართალდარღვევად ცნო, მას დაეწერა ადმინისტრაციულად 100–ლარიანი ჯარიმა.

რაც შეეხება კითხვას, დაიწყო თუ არა გამოძიება ცემასთან დაკავშირებით, როგორც შსს აცხადებს, არც სასამართლოზე და არც საპატრულო ეკიპაჟთან გასაუბრებაზე, აღნიშნულ პირს პრეტენზია არ გამოუთქვამს, რომ მას მიაყენა ვინმემ ფიზიკური შეურაცხყოფა.

"სასამართლოშიც შეგიძლიათ მოიკითხოთ, იქ რომ რამე ისეთი [დაზიანება] ყოფილიყო, მოსამართლე ამას მიაქცევდა ყურადღებას. თუ იგი მიმართავს საპატრული პოლიციას, რა თქმა უნდა, კანონის ფარგლებში მოვახდენთ შესაბამის რეაგირებას. ამ ეტაპზე თვითონ არაფერს არ ითხოვს და თვითონ არის ცნობილი დამნაშავედ სასამართლოს მხრიდან. მან თუ არ დააფიქსირა რომ მე წამაქცია ვინმემ, მომაყენა ფიზიკური შეურაცხყოფა, ტკივილი განვიცადე, ჩვენ კანონის ფარგლებში ვერ მოვახდენთ რეაგირებას. ფეიჯი [ქართული ძალა] არ ვიცი რას წერს, თვითონ რაც განაცხადა, იმას გეუბნებით" – განგვიცხადეს შინაგან საქმეთა სამინისტროს პრესსამსახურში.

შსს-ს თქმით, უცხოელს თარჯიმანი ადგილზეც ჰყავდა და სასამართლოშიც.

შესწორება: სტატიის თავდაპირველ სათაურში ეწერა, რომ უცხოელის ფოტო გამოაქვეყნა ქართულმა ძალამ. სათაური მას შემდეგ შეიცვალა, რაც დაზუსტდა, რომ აღნიშნული ფოტო ქართული ძალის გარდა, არაერთმა ფეისბუკ გვერდმა გაავრცელა.