გერმანიის მოხუცებულთა სახლში თერაპიას ფაფუკი ლამები და ალპაკები ატარებენ

გერმანიის ქალაქ რუდოლშტატის ერთ-ერთ მოხუცებულთა სახლში განსაკუთრებული სტუმრების — უფაფუკესი ლამებისა და ალპაკების ნახვა შეგიძლიათ. ისინი მოხუცებულთა სახლის ბინადრების თერაპიაში არიან ჩართულნი და ადამიანებთან ურთიერთობა და მოფერებაც ძალიან სიამოვნებთ.

დაწესებულების თანამშრომლების თქმით, ცხოველებთან ურთიერთობა ბავშვების გარდა, მოხუცებსაც ძალიან უყვართ. მათთან ერთად ყოფნა განსაკუთრებულად დადებითი შედეგის მომტანი დემენციის მქონე პაციენტებისთვის აღმოჩნდა.

ალპაკებმა და ლამებმა დაწესებულების ბინადრების გული მალევე მოიგეს. თანამშრომლები შედეგით იმდენად კმაყოფილნი დარჩნენ, რომ ცხოველები მოხუცებულთა სახლის მუდმივ სტუმრებად იქცნენ.

მოხუცებულთა სახლში მისულს ფუმფულა ლამები და ალპაკები ლიფტში, ბაღში და პაციენტების ოთახებშიც შეგხვდებათ. ცხოველები დაწესებულებაში მშვიდად დასეირნობენ და ბინადრებს მოფერებისა და დავარცხნის უფლებასაც აძლევენ.