აჭარის მთავრობის ხელმძღვანელის, თორნიკე რიჟვაძის განცხადებით, ავარიული შენობების პრობლემა ბათუმის გარდა საქართველოს სხვა დიდ ქალაქებშიც დგას. მისივე თქმით, ეს ათწლეულების განმავლობაში დაგროვებული პრობლემაა.

"აქ იყო კონკრეტული თვითნებური სამუშაოები და ამიტომაც დადგა პასუხისმგებლობა. ზოგადად, ბათუმში და ბევრ დიდ ქალაქში ავარიული სახლების პრობლემა გვაქვს ყველას და ეს არის ათწლეულების განმავლობაში დაგროვებული პრობლემა. ვმუშაობთ რომ ეს პრობლემები გადაიჭრას და ყველა მოქალაქე ცხოვრობდეს უსაფრთხოდ", — ამბობს რიჟვაძე მთავარ არხთან.

8 ოქტომბერს, ბათუმში, 26 მაისის ქუჩაზე საცხოვრებელი კორპუსი ჩამოინგრა. ბოლო ინფორმაციით, დაღუპულია 9 ადამიანი, გადარჩა ერთი. დაღუპულებს შორის 3 არასრულწლოვანია, ერთი 7 წლის, მეორე წლისა და 3 თვის და მესამე 12 წლის.

ბათუმში სამაშველო ღონისძიება თითქმის 30 საათის განმავლობაში მიმდინარეობდა.

ბათუმში მომხდარი ტრაგედიის გამო, 11 ოქტომბერი გლოვის დღედ გამოცხადდა. მთავრობის განკარგულებით, ორშაბათს 00:00 საათიდან, 12 ოქტომბრის 00:00 საათამდე, საქართველოს მთელს ტერიტორიაზე სახელმწიფო დროშები დაეშვება.