ბათუმის მერის მოადგილე, ლელა სურმანიძე აცხადებს, რომ ბათუმში ჩამონგრეულ კორპუსებში სავარაუდოდ, 7-8 ადამიანი იმყოფება. მისივე თქმით, ზუსტი რაოდენობა უცნობია, თუმცა გამომდინარე კორპუსში მცხოვრები ოჯახების რაოდენობიდან, ამდენს ვარაუდობენ.

სურმანიძე On.ge-სთან ამბობს იმასაც, რომ კორპუსის ჩამონგრეულ ნაწილში დაახლოებით 12 ოჯახი ცხოვრობდა, თუმცა ჯერჯერობით ზუსტად შეუძლებელია იმის თქმა, რამდენი ოჯახი იყო შემთხვევის ადგილზე ჩამონგრევის მომენტში, რადგან, მეზობლების ინფორმაციით, რამდენიმე ბინა დაკეტილი იყო და არავინ ცხოვრობდა. მისივე ინფორმაციით, ამ წუთებშიც ზუსტდება, ვინ იყო სახლში და ვინ — არა.

მერის მოადგილე აღნიშნავს, რომ სადარბაზოს იმ ნაწილიდან, რომელიც არ ჩამონგრეულა, ყველა ოჯახი ევაკუირებულია.

ბათუმში, 26 მაისის ქუჩაზე კორპუსი ჩამოინგრა. მსხვერპლის შესახებ ჯერჯერობით ინფორმაცია არ ვრცელდება. ამ ეტაპზე უცნობია ნგრევის მიზეზიც.

ჯერჯერობით, რაც დადასტურებულად ცნობილია, ნანგრევებში მოყოლილი მანქანიდან ერთი ბავშვი გამოიყვანეს. თავდაპირველად გავრცელდა ინფორმაცია ორი ბავშვის შესახებ, იგივე თქვა აჭარის ჯანდაცვის მინისტრმა ნინო ნიჟარაძემაც. თუმცა მოგვიანებით სამინისტრომ დააზუსტა, რომ ადგილზე იმყოფებოდა დედა და კიდევ ერთი ბავშვი, რომლებიც არ დაშავებულან, თუმცა სასწრაფო დახმარების ბრიგადამ კლინიკაში ორივე ბავშვი გადაიყვანა, რის გამოც გავრცელდა ინფორმაცია ორი ბავშვის დაშავების შესახებ.

გარდა ამისა, ცნობილია, რომ ნანგრევებში არის მინიმუმ ერთი ადამიანი, რომელიც კონტაქტურია.

შინაგან საქმეთა სამინისტროს ინფორმაციით, საცხოვრებელი კორპუსის ჩამონგრევაზე გამოძიება დაწყებულია.