ნაციონალური მოძრაობის თავმჯდომარის, ნიკა მელიას განცხადებით, გუშინ ღამით ქართულმა ოცნებამ ზუგდიდის საოლქო საარჩევნო კომისიაში ხმები უკანონოდ გადათვალა და მათი გამარჯვებული მაჟორიტარი პირველივე ტურში დამარცხებულად გამოაცხადა.

"გუშინ ღამე ქართული ოცნება ზუგდიდის საოლქო საარჩევნო კომისიაში შეიკრიბა, სრულიად უკანონოდ გადათვალეს ხმები, ასე ქურდულად საარჩევნო ზონდერებმა გადათვალეს ხმები და ერთ-ერთ ჩვენ გამარჯვებულ მაჟორიტარს, პირველ ტურშივე გამარჯვებულ მაჟორიტარს ხმები გადათვლის შემდეგ ჩაუთვალეს პირველ ტურში მარცხი. ანუ ქართულმა ოცნებამ გუშინ ნაციონალური მოძრაობის კანდიდატი, რომელმაც გაიმარჯვა პირველ ტურში, ერთ-ერთი კანდიდატი, ხმის გადათვლის შემდეგ დამარცხებულად გამოაცხადა პირველივე ტურში", — აცხადებს მელია ფეისბუქლაივში.

On.ge დაუკავშირდა ცენტრალურ საარჩევნო კომისიას და მათ პასუხს აღნიშნულ საკითხზე მიღებისთანავე შემოგთავაზებთ.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო.

ცენტრალური საარჩევნო კომისიის მონაცემებით, თვითმმართველობის არჩევნების მეორე ტური 20 მუნიციპალიტეტში გაიმართება. მეორე ტური ჩატარდება თბილისშიც.