სახალხო დამცველის, ნინო ლომჯარიას განცხადებით, 2021 წლის განმავლობაში 5 ივლისის მოვლენების გარდა, ომბუდმსენის აპარატმა ჟურნალისტების წინააღმდეგ მიმართული 24 შესაძლო დანაშაული დააფიქსირა. მისი თქმით, შემაშფოთებელია ის საფრთხის შემცველი გარემო, რომელშიც ჟურნალისტებს უწევთ მუშაობა წინასაარჩევნოდ.

"სამწუხაროდ, ამ დრომდე არ არის პასუხისგებაში მიცემული 5 ივლისს ჟურნალისტების წინააღმდეგ ძალადობის, ჯგუფური ძალადობის ორგანიზატორები, მიუხედავად იმისა, რომ ჩვენი მოსაზრებით, ორი პირის მიმართ არსებობს საკმარისი მტკიცებულება ბრალის წარსადგენად", — აღნიშნა მან.

ამასთან, ის კრიტიკულად აფასებს იმას, რომ პოლიტიკური თანამდებობის პირთა მხრიდან ჟურნალისტების მიმართ და განსაკუთრებით, კრიტიკულად განწყობილი მედიის წარმომადგენლების მიმართ, ცინიკური და აგდებული დამოკიდებულება ჩვეულ პრაქტიკად ჩამოყალიბდა.

"მათი დისკრედიტაციისკენ მიმართული განცხადებები, რაც ვფიქრობ, რომ ასევე ახალისებს მედიის წარმომადგენელთა მიმართ არსებულ ძალადობრივ ფონს", — აღნიშნა ობმუდმსენმა.

მან მოუწოდა ყველა საჯარო პოლიტიკური თანამდებობის პირს, რომ თავი შეიკავონ ჟურნალისტებისა და სადამკვირვებლო ორგანიზაციის წარმომადგენელთან დისკრედიტაციის კამპანიაში ჩართვისგან და მათთან ურთიერთობაში საერთაშორისოდ აღიარებული დემოკრატიული სტანდარტებით.