ცოტა ხნის წინ BBC წერდა, რომ შესაძლოა, რუსეთის მთავრობამ კინოთეატრებში დისნეის ახალი ფილმის Beauty and the Beast-ის ჩვენება აკრძალოს, ამის მიზეზი კი ე.წ. "გეი პროპაგანდის" ამკრძალავი კანონია, რომელიც რუსეთში მოქმედებს.

რუსეთის კულტურის მინისტრი ვლადიმერ მედინსკი ამბობდა, რომ პრემიერამდე ფილმს აუცილებლად ნახავენ და იმ შემთხვევაში, თუ ის "სამარცხვინო გეი და ცოდვილი სიუჟეტით" იქნება გაჯერებული ის აუცილებლად აიკრძალება.

დუმის დეპუტატმა ვიტალი მილინოვმა კი თქვა, რომ ფილმი "გეი პროპაგანდის" გამო არამხოლოდ რუსეთში არამედ ყველგან უნდა აიკრძალოს.

როგორც აღმოჩნდა, რუსეთში ფილმის აკრძალვა ვერ მოახერხეს, თუმცა ცენზურა დაადეს და მისი ნახვა მხოლოდ იმ ადამიანებისთვის არის ხელმისაწვდომი, რომელთა ასაკიც 16 წელს აღემატება.

მიუხედავად ამისა, რუსეთი გახდა ერთ-ერთი პირველი ქვეყანა, სადაც ფილმმა რეკორდი მოხსნა და ბოლო პერიოდში ყველაზე მეტი ბილეთი სწორედ მის სეანსებზე გაიყიდა. მზეთუნახავმა და ურჩხულმა, მხოლოდ შაბათ-კვირას, $6 მილიონის გაკეთება შეძლო.

საერთო ჯამში კი მისმა შემოსავალმა $350 მილიონს გადააჭარბა.

შეგახსენებთ, რომ ეს ფილმი დისნეის ისტორიაში არის პირველი, სადაც ღიად გეი პერსონაჟს ვიხილავთ, თანაც საკუთარი სასიყვარულო ისტორიით.