ევროპაში ნატოს ძალების სარდალი გენერალი ფილიპ ბრიდლავის განცხადებით, რუსეთი და ევროპის სამხრეთ საზღვრებთან არსებული არასტაბილური სიტუაცია ამერიკის ნაციონალური უსაფრთხოებისთვის საშიშია.

კონგრესის შეიარაღებული ძალების კომიტეტში გამართულ საბიუჯეტო მოსმენაზე ბრიდლავმა რუსეთის ქმედებებზე და შესაბამის საფრთხეებზე ვრცლად ისაუბრა. მისი თქმით, რუსეთის ფედერაცია შეგნებულად მოქმედებს ისე, რომ ამერიკისა და ევროპისთვის საფრთხეს წარმოადგენდეს:

"რუსეთს სურს, რომ გადაწეროს არსებული საერთაშორისო წესები."

გენერალის განცხადებით, იმისათვის რომ რუსეთმა განზრახვაზე ხელი აიღოს საჭიროა კონტრ მოქმედებები, ევროპელ პარტნიორებთან აქტიურად მუშაობა და საჭიროების შემთხვევაში ბრძოლა და გამარჯვება.

ბრიდლოვი ამბობს, რომ მიუხედავად რუსეთის განცხადებებისა, ISIS-სთან ბრძოლაში ქვეყანას არაფერი გაუკეთებია და სირიაში მათი მოქმედებები ძირითადად ასადის რეჟიმის მოძლიერებას და მიგრაციის კრიზისის გაღრმავებას ემსახურება, რათა ევროპაში სიტუაციის დესტაბილიზირება მოხდეს.

კონგრესის წინაშე წარდგენილ ბიუჯეტში, "ევროპის მხარდაჭერის ინიციატივისთვის" $3.4 მილიარდია გამოყოფილი, ბრიდლოვი სწორედ ამ საკითხთან დაკავშირებით წარსდგა კომიტეტის წინაშე.

"ევროპული მხარდაჭერის ინიციატივის" ფარგლებში იგეგმება ამერიკული სამხედრო კონტიგენტისა და ტექნიკის რაოდენობის გაზრდა ევროპაში, ნატოს წევრი ქვეყნების საზღვრებისა და მოკავშირეების ეროვნული უსაფრთხოების დასაცავად.