ირაკლი ღარიბაშვილი ნამახვანჰესზე საუბრისას აცხადებს, რომ სახელმწიფოსა და ინვესტორს შორის გაფორმებული კონტრაქტი მემკვიდრეობით დახვდა და ბევრი პირობა მისთვის მიუღებელი იყო.

"ეს კონტრაქტი მე მეკვიდრეობით დამხვდა. ისევე, როგორც ძალიან ბევრი რამ დამხვდა მემკვიდრეობით. ბუნებრივია, ამ კონტრაქტში ბევრი რამ იყო მიუღებელ და ამის შესახებ მე ღიად მქონდა საუბარი ინვესტორთან. ეს არის ჩვენი სუვერენული უფლება, რომ ინვესტორს ვესაუბროთ იმ პირობების გაუმჯობესებაზე, რომელიც ჩვენს მოსახლეობას აწუხებდა", — განაცხადა ირაკლი ღარიბაშვილმა.

როგორც ცნობილია, ნამახვანჰესის კონტრაქტორ კომპანიასა და მთავრობას შორის ხელშეკრულება 2019 წელს გაფორმდა. მთავრობის მხრიდან ხელშეკრულების ხელმომწერი ღარიბაშვილის ამჟამინდელი კაბინეტის წევრი, ეკონომიკისა და მდგრადი განვითარების მინისტრი, ნათია თურნავაა.

დღეს გამართულ ბრიფინგზე ჟურნალისტებმა თურნავას ჰკითხეს, თუ რატომ დაახვედრა ღარიბაშვილს "ცუდი მემკვიდრეობა". ამ კითხვაზე პასუხად თურნავამ განაცხადა, რომ საერთაშორისო არბიტრაჟის რისკის გამო, ის თავს შეიკავებს დეტალებზე საუბრისგან. ამასთან, მინისტრმა აღნიშნა, რომ ნამახვანის პროექტის განხორციელება ქვეყნისთვის ძალიან მნიშვნელოვანია.

"რადგან არის ასეთი ვითარება, რომ საერთაშორისო არბიტრაჟის რისკი დგას, მე თავს შევიკავებ ამ საკითხის დეტალებზე საუბრისას, რათა შესაძლო დავის შემთხვევაში ჩვენი პოზიციები არ დავაზიანო. ჩვენ ყველაფერს გავაკეთებთ იმისთვის, რომ დავამდე საქმე არ მივიდეს და ისევ მოლაპარაკებითა და კომუნიკაციით გადაწყდეს ეს საკითხი.

ნამახვანის პროექტი უნდა განხორციელდეს. შესაძლებელია განხორციელდეს უკეთესი პირობებით, რადგან ყოველთვის შეიძლება პირობების გაუმჯობესება. ფაქტია, რომ ჩვენი წინა კომუნიკაცია ინვესტორთან, სადაც ჩართული იყო ევროკავშირის მედიაციაც და სხვადასხვა პლატფორმა იყო იქითკენ მიმართული, რომ უფრო მეტად განხორციელებადი გამხდარიყო ეს პროექტი", — განაცხადა ნათია თურნავამ.

როგორც ღარიბაშვილი, ასევე თურნავაც ამბობს, რომ ყველაფერს აკეთებენ, რათა ინვესტორთან საარბიტრაჟო დავაში არ აღმოჩნდნენ. ღარიბაშვილმა ისიც თქვა, რომ მთავრობამ ყველა პირობა შეუქმნა ენკას, რათა კომპანიას სამუშაოები გაეგრძელებინა.

"ჩვენ, რა თქმა უნდა, გავაგრძელებთ დიალოგს და კომუნიკაციას ინვესტორთან. ჩვენ მათ აბსოლუტურად ყველა პირობა შევუქმენით იმისთვის, რომ ნორმალურ პირობებში გაეგრძლელებინათ სამუშაოები. მიუხედავად იმ პროტესტისა, რომელიც ადგილზე იყო. ჩვენ გვექნება დიალოგი და შემდგომ ბედს უახლოეს ერთ თვეში გავარკვევთ", — განაცხადა პრემიერმინისტრმა.

22 სექტემბერს ცნობილი გახდა, რომ ENKA საქართველოს მთავრობასთან ხელშეკრულებას წყვეტს და ნამახვანჰესს აღარ ააშენებს. აღნიშნული სტამბულის საფონდო ბირჟაზე გავრცელებულ განცხადებაშია ნათქვამი.

17 სექტემბერს ნამახვენჰესის მშენებლობის მოწინააღმდეგეებმა 3-თვიანი დახურული მოლაპარაკებების შემდეგ ხელისუფლებასთან მედიაციის პროცესი დატოვეს. მედიაცია პარტნიორ ქვეყნებთან ერთად მიმდინარეობდა. მთავრობამ ნამახვანჰესთან დაკავშირებულ დისკუსიებში ევროკავშირის ენერგეტიკული გაერთიანების წარმომადგენლის ჩართვის შესახებ გადაწყვეტილება 24 აპრილს გაასაჯაროვა.

რიონის ხეობის აქტივისტებისგან განსხვავებით, ნამახვანჰესის კასკადის აუცილებლობასა და წარმატებაზე საუბრობდა ხელისუფლება. ეკონომიკის სამინისტროს არაერთხელ განუცხადებია, რომ ეს პროექტი ქვეყნის ენერგოდამოუკიდებლობისკენ და უსაფრთხოებისკენ ერთ-ერთი აუცილებელი ნაბიჯია.