პარლამენტის იურიდიულ საკითხთა კომიტეტის თავმჯდომარის, ეკა ბესელიას განცხადებით, პრეზიდენტის ვეტოს მიუხედავად, ქართული ოცნება მოსმენების შესახებ კანონს მაინც მიიღებს. მისივე თქმით, რაც არ უნდა ეწეროს პრეზიდენტის შენიშვნებში, მარგველაშვილმა დისკუსიის დრო არ დატოვა, რადგან პარლამენტს კანონი 31 მარტამდე აქვს მისაღები:

"პირველი რაც მაწუხებს ის არის, რომ ვადები რომლებიც ძალიან შეზღუდულია საკონსტიტუციო სასამართლოს მიერ, იცით რომ 31 მარტს იწურება, პრეზიდენტმა ბოლომდე გამოიყენა რაც მგონია, რომ ამ პროცესს უქმნის საფრთხეს იმიტომ, რომ აქ საქმე ეხება უსაფრთხოების სისტემას და ეხება სისტემას რომლითაც, ჩვენ არა ერთი, ორი, ასი, ორასი, არამედ, მთელი ქვეყნის მოსახლეობის დაცვის გარანტიებზე გვევალება პასუხისმგებლობა. ახლა მოგვიწევს, ამ მოცემულობიდან გამომდინარე, რომ ძალიან სწრაფ რეჟიმში მივიღოთ გადაწყვეტილება. ეს იმას ნიშნავს, რომ რაც არ უნდა ეწეროს შენიშვნებში, დისკუსიის დროც კი აღარ დატოვა პრეზიდენტმა."

ბესელიას განცხადებით, "გერმანიასაც აქვს მსგავსი [ვეტოს დადების] შესაძლებლობა და აბა იკითხეთ ბოლო როდის გამოიყენა პრზიდენტმა ეს შესაძლებლობა."

საქართველოს პრეზიდენტმა გიორგი მარგველაშვილმა ე.წ. მოსმენების შესახებ საკანონმდებლო პაკეტს ვეტო დაადო. პრეზიდენტის აზრით, კანონს ორი ძირითადი ხარვეზი აქვს:

  • პირველი, ეს არის სააგენტოს დამოუკიდებლობა, რომელიც წარმოდგენილი კანონპროექტით არ არის უზრუნველყოფილი და შესაბამისად, ეწინააღმდეგება ამ საკითხზე საკონსტიტუციო სასამართლოს გადაწყვეტილებას.
  • მეორე ეს არის კანონპროექტში გაუმართლებელი და არაპროგნოზირებადი ხარჯები, რომელსაც ეს კანონპროექტი აკისრებს საკომუნიკაციო კომპანიებს.