ქართული ოცნების თავმჯდომარის, ირაკლი კობახიძის განცხადებით, ევროკავშირის ელჩის, კარლ ჰარცელის განცხადება მეტისმეტად რბილი იყო და ეს შეიძლება ნიკა მელიამ მწვანე შუქის ანთებად მიიღოს.

"კონკრეტულად ჰარცელის განცხადებას ვგულისხმობ, რომელიც იყო მეტისმეტად რბილი და ეს მეტისმეტად რბილი, შეიძლება, ნიკანორ მელიამ, რომელსაც ისედაც აქვს ინტელექტის პრობლემა, გაიგოს როგორც მწვანე შუქი შემდგომი პროვოკაციებისთვის", — განაცხადა კობახიძემ.

მისივე თქმით, როდესაც ასეთი მძიმე პროვოკაცია ხორციელდება, ამას შეფასება სჭირდება.

"მე მგონი, შეფასება იყო საჭირო და ეს შეფასება უნდა ყოფილიყო მკაფიო. რა თქმა უნდა, როდესაც ასეთი მძიმე პროვოკაცია ხორციელდება, ამას სჭირდება შესაბამისი შეფასება. როდესაც ასეთი შეფასება არ არის სახეზე, ასეთ შემთხვევაში ეს მელიასნაირმა ადამიანმა შეიძლება მიიღოს, როგორც მწვანე შუქი შემდეგ პროვოკაციებზე და ჩვენ ვნახეთ დღეს იყო გარკვეული განცხადება გაკეთებული და სწორედ ასეთი განცხადებები შეიძლება გახდეს ერთგვარი მწვანე შუქი ნიკა მელიასთვის იმისათვის, რომ მან განახორციელოს დამატებით ახალი პროვოკაციები. ეს არის ძალიან ცუდი, ბუნებრივია, საჭიროა მკაფიო შეფასება იმისა, რაც გააკეთა ნიკანორ მელიამ", — აცხადებს ის.

ევოკავშირის ელჩმა საქართველოში, კარლ ჰარცელმა ნიკა მელიასა და ირაკლი კობახიძეს შორის დაპირისპირების შესახებ განცხადება გაავრცელა და თქვა, რომ წუხს ამ ფაქტის გამო. მისი თქმით, მისასალმებელია კობახიძის მხრიდან ბოდიშის მოხდა.

გუშინ 23 სექტემბერს, ევროკავშირის ოფისთან, ნიკა მელია და ირაკლი კობახიძე ერთმანეთს დაუპირისპირდნენ. ინციდენტი მაშინ მოხდა, როცა კობახიძე ჟურნალისტებს კომენტარს აძლევდა. ადგილზე მელიას მისვლის შემდეგ ჯერ სიტყვიერი დაპირისპირება დაიწყო, შემდეგ კი ერთმანეთისკენ ფიზიკურად გაიწიეს.

ისინი ერთმანეთს ხელებს უქნევდნენ, მუშტი ჰქონდათ მოღერებული, მათ შორის კი ჟურნალისტები და ოპერატორები იდგნენ. კობახიძეს რამდენჯერმე მუშტი დაუჭირეს, ხოლო მელიამ მიკროფონზე მიუთითა და მმართველი გუნდის თავმჯდომარეს ჰკითხა, "გინდა გესროლო?". მოგვიანებით კობახიძე დაცვამ ადგილიდან გაიყვანა.