თბილისის მერობის კანდიდატმა, კახა კალაძემ, კონკურენტის, გიორგი გახარიას შესაძლო ნარკომომხმარებლობასთან დაკავშირებულ კითხვას თავი აარიდა და ჟურნალისტს უთხრა, რომ ამ საკითხზე დეტალებს პარტიის თავმჯდომარე, ირაკლი კობახიძე მოუყვება.

"თქვენ შეგიძლიათ ირაკლის [კობახიძეს] ჰკითხოთ ეს და უფრო დეტალურად გეტყვით, რა იცის ამასთან დაკავშირებით [...] მე არ ვიცი იმიტომ, რომ მთელი ამ ხნის განმავლობაში დაკავებული ვარ საარჩევნო კამპანიით", — განაცხადა კახა კალაძემ.

გუშინ, 23 სექტემბერს ირაკლი კობახიძემ იმედის ეთერში განაცხადა, რომ "გიორგი გახარიას კოკაინი პირველად ერთ-ერთმა ქალბატონმა გაასინჯა და მას შემდეგ აქვს მას ეს პრობლემა". მისივე თქმით, იციან კონკრეტული სახელები და გვარები. ბოლო დღეების განმავლობაში, ქართული ოცნების ლიდერები ღიად მიანიშნებენ იმის შესახებ, რომ გიორგი გახარია ნარკოტიკებს მოიხმარს. კობახიძემ მას პირდაპირ უწოდა "კოკაინშიკი". ამის მიუხედავად, კალაძე ამტკიცებს, რომ გახარიასთვის ნარკომანობა არ დაუბრალებიათ.

17 სექტემბერს გიორგი გახარიამ განაცხადა, რომ ვენის ჰოსპიტალში ჩატარებული ექსპერტიზის შედეგად, ნარკოტიკული ნივთიერების მოხმარება არ დაუდასტურდა. იქამდე მან უარი თქვა ნარკოტესტის სამხარაულის ექსპერტიზის ბიუროში ჩატარებაზე და განაცხადა, რომ ქართული ოცნება მას პროვოკაციას უმზადებდა.

ნარკოტესტი პირველად ქართული ოცნების მერობის კანდიდატმა, კახა კალაძემ ჩაიტარა, ეს ჯანსაღი ცხოვრების პოპულარიზაციით ახსნა და სხვა კანდიდატებსაც იგივე მოუწოდა. მოწოდების საპასუხოდ, გახარიამ განაცხადა, რომ ოპონენტებმა მასთან დებატებზე პირისპირ დაჯდომის შიშით "ბანკებით" სირბილი დაიწყეს. 10 სექტემბერს მან, ასევე, განაცხადა, რომ ახლო მომავალში ნარკოტესტთან დაკავშირებით "საინტერესო ინფორმაციას" გაამხელდა.

გაიგე მეტი: