თუ 2021 წელი თქვენთვის საკმარისად მოულოდნელი მოვლენებით სავსე არ იყო, მაშინ ჯო ეგზოტიკის ისტორიის გაგრძელება ეცდება თქვენს გაოცებას.

სულ ახლახან ოფიციალურად დადასტურდა, რომ სტრიმინგ სერვის ნეტფლიქსმა თავისი გახმაურებული დოკუმენტური სერიალის Tiger King მეორე სეზონი გადაიღო.

ჯერჯერობით უცნობია, კონკრეტულად ვის შესახებ მოგვითხრობს ახალი სეზონი, დროის რომელ პერიოდში განვითარებულ მოვლენებს ასახავს და ვინ მიიღებს მასში მონაწილეობას, თუმცა ნეტფლიქსის მიერ გამოქვეყნებული სამომავლო დოკუმენტური სერიალების ტრეილერში ჯო ეგზოტიკის და კეროლ ბასკინის კადრებს (0:52-დან) ვხედავთ:

ამჟამად არ გავრცელებულა Tiger King 2-ის პრემიერის ზუსტი თარიღი, მაგრამ ვიცით, რომ მაყურებელი მის ხილვას წლის ბოლომდე შეძლებს.

ამ სერიალის პირველი სეზონი გასული წლის დასაწყისში გამოვიდა და მალევე მილიონობით გულშემატკივარი შეიძინა: მიუხედავად დოკუმენტური ჟანრისა, ვეფხვების მეფე ნეტფლიქსზე 2020 წლის განმავლობაში ყველაზე ბევრჯერ ნანახი შოუების ხუთეულში მოხვდა.