სახელმწიფო ინსპექტორის სამსახურის განცხადებით, შინაგან საქმეთა სამინისტრო ლექსო ლაშქარავას გადაადგილების ვიდეოჩანაწერების გასაჯაროების გამო 2 000 ლარი, ხოლო სამედიცინო დაწესებულება 500 ლარით დაჯარიმდა.

ინსპექტორის სამსახურის განცხადებით, შინაგან საქმეთა სამინისტროს მიერ 2021 წლის 11 ივლისს გამართული ბრიფინგების ფარგლებში ლექსო ლაშქარავას გადაადგილების ამსახველი ვიდეოჩანაწერების გასაჯაროებას არ ჰქონდა კონკრეტული და მკაფიოდ განსაზღვრული კანონიერი მიზანი.

მათივე თქმით, სამინისტროს მიერ გამართული ბრიფინგის მიზანს ოპერატორის გარდაცვალების საქმეზე დაწყებული გამოძიების შესახებ საზოგადოების ინფორმირება წარმოადგენდა, თუმცა 11 ივლისს გამართული ბრიფინგების ფარგლებში შსს-მ ვერ დაასახელა ლაშქარავას გარდაცვალების კონკრეტული მიზეზი, პარალელურად კი უწყებამ ბრიფინგებზე ლაშქარავას გადაადგილების ამსახველი ვიდეოჩანაწერები შესაბამისი კომენტარებით, თუმცა საზოგადოებას არ მიაწოდა ინფორმაცია მათი გასაჯაროების მიზნებისა და მიმდინარე გამოძიებასთან ვიდეოჩანაწერების მიზეზობრივი კავშირის შესახებ.

2020 წლის 11 ივლისს ინტერნეტსივრცეში ალექსანდრე ლაშქარავას პერსონალური, მათ შორის, განსაკუთრებული კატეგორიის მონაცემების გასაჯაროების საქმეზე ინსპექტორის სამსახურმა დაადგინა, რომ გავრცელებული მონაცემები შსს-ს საინფორმაციო ბაზაში აღრიცხული მონაცემების იდენტურია.

"ინტერნეტში გავრცელებული და სამინისტროს საინფორმაციო ბაზაში მითითებული ინფორმაციები თანხვედრაშია ერთმანეთთან, როგორც სტრუქტურით და თანამიმდევრობით, ასევე ტექსტში გამოყენებული სიმბოლოებით (სასვენი ნიშნებით); საინფორმაციო ბაზა — info.pol.ge-ში დაცულ ალექსანდრე (ლექსო) ლაშქარავას მონაცემებთან წვდომა 2021 წლის 5 ივლისიდან 11 ივლისის ჩათვლით ჰქონდათ მხოლოდ საქართველოს შინაგან საქმეთა სამინისტროს თანამშრომლებს, რომელთა აბსოლუტურმა უმრავლესობამ მონაცემებზე წვდომა განახორციელა 2021 წლის 11 ივლისს; საინფორმაციო ბაზა — info.pol.ge-ში დაცულ ალექსანდრე (ლექსო) ლაშქარავას მონაცემებთან წვდომა ჰქონდა საქართველოს შინაგან საქმეთა სამინისტროს სხვადასხვა (თითქმის ყველა) სტრუქტურული დანაყოფის 82 თანამშრომელს. შემოწმების შედეგად გამოვლენილი ზემოაღნიშნული გარემოებები მიუთითებს ალექსანდრე (ლექსო) ლაშქარავას პერსონალური მონაცემების საქართველოს შინაგან საქმეთა სამინისტროს თანამშრომლ(ებ)ის მხრიდან გამჟღავნების ფაქტზე", — აცხადებს ინსპექტორი.

უწყების ცნობით, შინაგან საქმეთა სამინისტროს პერსონალური მონაცემთა დაცვის შესახებ კანონის 43-ე და 44-ე მუხლების მეორე პუნქტებით გათვალისწინებული სამართალდარღვევისთვის დაეკისრა ადმინისტრაციული პასუხისმგებლობა, რაც მონაცემთა სამართლებრივი საფუძვლის გარეშე დამუშავებას ნიშნავს ჩადენილს იმ პირის მიერ, რომელსაც ერთი წლის განმავლობაში შეეფარდა ადმინისტრაციული სახდელი ამავე მუხლით და მონაცემთა დამუშავების პრინციპების დარღვევას ჩადენილს იმ პირის მიერ, რომელსაც ერთი წლის განმავლობაში შეეფარდა ადმინისტრაციული სახდელი ამავე მუხლით. სამედიცინო დაწესებულებას ადმინისტრაციული პასუხისმგებლობა პერსონალურ მონაცემთა დაცვის შესახებ საქართველოს კანონის 43-ე, 44-ე და 46-ე მუხლების პირველი პუნქტებით გათვალისწინებული სამართალდარღვევისთვის შეეფარდა, რაც ნიშნავს მონაცემთა სამართლებრივი საფუძვლის გარეშე დამუშავებას, მონაცემთა დამუშავების პრინციპების დარღვევასა და მონაცემთა უსაფრთხოების დაცვის მოთხოვნის შეუსრულებლობას.

შინაგან საქმეთა სამინისტრომ ლექსო ლაშქარავაზე გაკეთებული ვიდეოების დასპონსორებაში 700 დოლარამდე დახარჯა. ფეისბუქის Ad Library-ის მონაცემების მიხედვით, უწყებამ 5 ივლისს ნაცემი გარდაცვლილი ოპერატორის საქმეზე დაარეკლამა 2 ვიდეო, მათგან ერთ-ერთი ორჯერ. ვიდეოების სარეკლემო ბიუჯეტი 100-დან 400 დოლარამდე მერყეობდა.

5 ივლისს, ჰომოფობიური და ძალადობრივი ჯგუფების თავდასხმის შედეგად 53 ჟურნალისტი დაშავდა. მათგან ერთი TV პირველის ოპერატორი, ლექსო ლაშქარავა 11 ივნისს გარდაიცვალა. ცემის შედეგად მას ჰქონდა სახის ძვლების მოტეხილობა თვალის გარშემო, ტვინის შერყევა და დაჟეჟილობები. იგი რამდენიმე დღე საავადმყოფოში იმყოფებოდა და 10 ივლისს სახლში გაეწერა.

ალექსანდრე ლაშქარავასა და ჟურნალისტ მირანდა ბაღათურიას ძალადობრივი კონტრაქციის მონაწილეები თავს მოძრაობა სირცხვილიას ოფისში შეჭრის მცდელობისას დაესხნენ. ლაშქარავა ჯერ კიდევ საავადმყოფოში იმყოფებოდა, როცა On.ge-ს შემთხვევის დეტალები მოუყვა.

"უბრალოდ კიბეზე შეგვეფეთნენ, ჟურნალისტზე გაიწიეს ჯერ და შემდეგ ჩამქოლეს. არ ვიცი, 50 კაცი მირტყამდა, მთელი კიბის საფეხური, ზედა ნაწილი, ქვედა ნაწილი. რაღაც ნაწილი ავიდა ზევით, დავიწყე გაყოლა. რამდენიმე სართულზე იყვნენ ესენი, რამდენიმე სართულმა მცემა. ჩამაგდეს, ქვევით გადამაგდეს და ისე მცემეს, ტექნიკა დააქუცმაცეს, არ ვიცი, ასეთი შთაბეჭდილება მრჩება, რომ უნდოდათ მედია გამოეყვანათ მწყობრიდან [...]

ახლა მე მეძახიან ამოცნობაზე მოდიო, მაგრამ ორი დღე კიდევ აქ უნდა ვიყო, ვერ გავდივარ და იდენტიფიცირება წარმოუდგენელია მოვახდინო, იმიტომ, რომ 50-60 ადამიანი იყო", — ყვებოდა ლაშქარავა 6 ივლისს, თავდასხმიდან მეორე დღეს.

ლაშქარავას გარდაცვალებიდან მეორე დღეს, შსს-ში სპეციალური ბრიფინგი გაიმართა, სადაც განაცხადეს, რომ შუალედური ექსპერტიზის მიხედვით, მისი გარდაცვალების მიზეზი შესაძლოა გამხდარიყო ზედოზირება. უწყებამ, ასევე, გაავრცელა ლაშქარავას გადაადგილების მარშრუტის ვიდეომასალა, სადაც, მათივე განმარტებით, ჩანს როგორ მიდის ის ფონიჭალაში.

გაიგე მეტი: